Pirinio Atlantikoetako akademia ikuskaritzaren egoitzek 'Baxoa euskaraz' zioten afixaz josita hasi dute eguna. Azterketak Euskaraz taldeak gauean jarri ditu afixak, ikuskaritzak Donapaleun eta Baionan dituen egoitzetan.
Aspaldiko eskakizuna da Lapurdiko, Nafarroa Behereko eta Zuberoako ikasleek baxoko azterketak euskaraz egin ahal izatea. Martxoan, euskarazko irakaskuntzan aritzen diren eragileek, hots, Seaska, Biga Bai, Ikas Bi eta Euskal Haziak elkarteek jendaurrean berretsi zuten eskaera, eta, zehazki, Matematikako azterketa eta baxoko ahozko handiaren zati bat aurtendik euskaraz egitea galdegin zuten.
Apirilaren 9an, Seaskako ordezkaritza batek bilkura egin zuen Jean-Marc Huart Akademia errektorearekin, Bordelen (Okzitania), eskaeraren berri emateko. Azaldu zutenez, bilkura «adeitsua» izan zen, baina errektoreak ez zien erantzun argirik eman, eta horren zain gelditu ziren. Apirilaren 11n, baina, Akademiak gutun baten bidez jakinarazi zien Matematikako azterketa frantsesez egin beharko dutela ikasleek ekainean: «2026ko azterketa aldiko probak eta 2027ko azterketa aldiko aitzinetatiko probak indarrean dagoen araudiaren arabera baizik ez daitezke iragan». Baxoko ahozko handiaren aipamenik ez zekarren Akademiaren erantzunak.
