Bordeleko Hezkuntza Akademiak larunbatean baieztatu zuenez, euskaraz ikasten duten ikasleek ezinen dute baxoko Matematikako azterketa euskaraz egin. Ahozko handia euskaraz pasatzeko eskaera ere egin zuten Seaska, Biga Bai eta Euskal Haziak elkarteetako kideek, baina, bidalitako erantzun-gutunean, bigarren azterketa horren aipamenik ez du egin akademiak.
Leheneko ikasleek egiten duten Matematikako azterketa eta baxoko ahozko handiaren zati bat aurtendik euskaraz egitea nahi zuten eragileek. Martxo hondarrean bildu ziren aldarrikapen bateratua egiteko, hots, baxoan euskaraz aritzeko eskubidea errespetatzea galdegiteko Frantziako Hezkuntza Ministerioari. Baina hara, Bordeleko Akademiaren ezezkoa jaso dute orain. Zehazki, zera adierazi dute gutunean: «2026ko azterketa aldiko probak eta 2027ko azterketa aldiko aitzinetatiko probak indarrean dagoen araudiaren arabera baizik ez daitezke iragan».
Joan den astean, gainera, Frantziako Asanblea Nazionalean izan ziren euskaraz ikasten duten ikasleak ez ezik bretoieraz ikasten dutenak ere. Orduan, «egoera injustu» baten salatzera joan ziren.
Peio Dufau EH Baiko diputatuak bere sare sozialetan erreakzionatu zuen larunbatean: «Arratsalde honetan jakin dugu Bordeleko Akademiako errektorearen aldetik aurten ez dutela baxoko Matematika azterketarik euskaraz antolatuko, nahiz eta teknikoki posible izan, lehen ere egin izan delako». Hain zuzen ere, zenbait urte dira Matematikako azterketarik ez zela gehiago baxoan, erreformarekin kendu baitzuten, 2019an. Hori aitzin, ordea, 2016tik posible zen Matematika euskaraz erantzutea. Aurten berriz ezarri dute Matematika aztergai, eta, beraz, ikasleek ezinen dute azterketa euskaraz egin.
Dufauren arabera, «entzuteko borondatea balego, euskarazko azterketak mantenduko lirateke, behin-behinean bada ere, marko egonkor bat adostu arte».
