Joan den ostiralean gertatu bezalaxe, gaur ere bizitzeko alternatibarik ez duen familia bat etxegabetu dute Gasteizen, eta familia horretako bi kide adingabeak dira.
Familia hori Abendaño ikastolako parte da, eta hango komunitateak agerraldi bat egin du gaur goizean, gaurko etxegabetzea eta urriaren 23an egingo dutena salatzeko. Izan ere, egun horretan beste familia bat etxegabetuko dute. Bi sendiak dira ikastolako komunitateko kide, eta ikastetxeak elkartasuna eta babesa adierazi die biei.
«Bi familiak kontuan izanda, guztira, zortzi adingabe daude: sei familia batean eta bi bestean. Kezkatuta gaude: etxebizitza duin eta egonkor bat izateko alternatibarik ez dute bermatuta», azaldu dute, eta eskari zehatzak egin dizkiete erakundeei: bi etxegabetzeak gelditzea; familia bakoitzari «etxebizitza duin, egoki eta egonkor bat» bermatzea; adingabeen eskubideak bermatu eta haien eskola eta gizarte ingurunea babestea; «premiaz eta koordinatuta» jardutea; eta etxebizitzarako laguntza publikoak indartzea.
Etxebizitza Sindikatu Sozialistak, bere aldetik, elkarretaratzera deitu du biharko, azken asteko etxegabetzeak salatzeko eta etxebizitzarako eskubideak bermatuta egon behar duela aldarrikatzeko. 19:00etan egingo dute, Andre Mari Zuriaren plazan.
«PSOEk bere burua etxebizitza krisiari aurre egiteko konponbide gisa aurkezten ari bada ere, hori da errealitatea langile klaseko familien egunerokoan», salatu du sindikatuak.
