«Aldi honetan ez duzue eskalatu». Umorez mintzatu zaio Frantziako Polizia Gorka Torre ekintzaileari. Baionako komisariako lau agenteak iritsi direnerako, EHE Euskal Herrian Euskaraz taldeko kideek bururatua zuten Pirinio Atlantikoetako departamenduak Baionan duen eraikinean egin duten margoketa. Euskaraz bizi nahi dugu leloa idatzi dute. Prentsari bidalitako ohar batean, EEPren eta EKEren aurrekontuetan izandako gorabeherak gaitzetsi dituzte, eta euskararekiko «itxurakeriaz» jardutea leporatu diete Frantziako agintariei.
[AZKEN ORDUA]
— Ekhi Erremundegi (@EkhiErremundegi) September 27, 2025
Margoketa egin du @EHEbizi-k Baionan, Pirinio Atlantikoetako departamentu kontseiluaren eraikinean. 'Euskaraz bizi nahi dugu' idatzi dute @berria pic.twitter.com/4U1Qhj06sI
Azken hilabeteetan, euskararen eta euskal kulturaren kontrako kolpeak iritsi dira Paristik. Ekainean jakin zen Frantziako Estatuak 100.000 eurora mugatuko zuela EEP Euskararen Erakunde Publikoaren aurrekontuaren igoera —esperotakoa baino askoz ere gutxiago—, eta abuztuan iragarri zuten 30.000 euro kenduko dizkiotela EKE Euskal Kultur Erakundeari.
EHEren iritziz, horrek guziak erakusten du Frantziako Estatuko agintariak «beti bezala itxurakeriaz» ari direla euskararekiko, eta euskaldunak «bigarren mailako herritar gisa» tratatzen dituztela. «Hain zuzen, Euskal Herrian frantsesez eta gazteleraz bizi nahi dutenak pribilegiatuak dira, hizkuntza horietan bizi daitezkeelako, euskaldunak Euskal Herrian ezin gaitezkeelarik euskaraz bizi», adierazi dute.
Departamenduaren egoitzan margoketa eginda, egoera hau salatu, eta bi estatuek erdaldunak ez pribilegiatzea eskatu nahi izan dutela erran dute. «Euskararen alde, Euskal Herriaren independentziaren alde eta justizia gauzatuko duen gizarte baten alde dena eman dutenak omentzeko, ekintza hau Gudarien Egunean egiten dugu».
Azkenik, palestinarrek pairatzen duten genozidioa salatu, eta abenduaren 6an EHEk Durangon (Bizkaia) eginen duen manifestazio nazionalean parte hartzera deitu dituzte euskaltzale independentistak.
