Hainbat greba egunen ostean, otsailaren 5ean sinatu zuten greba amaitzeko akordioa sindikatuek Kristau Eskolarekin eta IZEArekin. «Hiru hilabete igaro dira ordutik, eta oraindik ez da betetzen ari», ohartarazi du ELAk ohar bidez. Gaur izan dute azken bilera ELA, Steilas, CCOO, LAB eta UGT sindikatuek patronalekin, eta ELA ez dago ados bertan jaso duten erantzunarekin: «Patronalek berretsi dute akordioaren aplikazioa atzeratu eta sinatu ziren baldintzak berriro negoziatu nahi dituztela».
ELAren irudiko, «arduragabea» da Kristau Eskolaren eta IZEAren jarrera, eta erantzuna prestatzen ari dira: «Sindikatuek datozen egunetan iragarriko dute zer urrats egingo dituzten akordioa defendatzeko eta adostutako baldintzetan bete dadila bermatzeko».
Protesta ugariren ostean lortu zuten ituna sindikatuek. Bertan jasota dago, besteak beste, langileen soldatak %16 igotzea, baita ordutegia murriztea ere.
