Atzo hasi zen Zestoako (Gipuzkoa) sei lagunen kontrako epaiketan, bere tesiari eutsi zion akusazioak. Integritate moralaren kontrako delitua egitea egotzita, epaituetako baten bikotekide ohiak eraman ditu auzitara seiak, espetxe zigorra eskatuta. Bost lagunak, baina, gizonezko horren bikotekide ohia —hura ere epaitua— babesten aritu ziren, mugimendu feministak adierazi duenez: alegia, elkartasun feminista praktikatzen.
Salatzailearen bertsioa entzun zen atzoko auzi saioan, hark ez ezik hark deitutako lekukoek deklaratu baitzuten. Gaur, defentsaren lekukoen bertsioa entzun ahal izango da, eta bihar, epaituena beraiena. Bi bertsio aurrez aurre.
Ikusi gehiago
Atzokoa saio «gogorra» izan da epaituentzat. Salaketa jarri zuen gizona bera izan zen deklaratzen aurrena. Fiskalaren, akusazioaren eta defentsaren abokatuen galderei erantzun zien, eta zera kontatu zuen: bikote harremana bukatu berritan bikotekide ohiak semearen zaintzari uko egiteko eskatu ziola, eta ezezkoa eman zionean «bere bizitza hondatzea beste helbururik izan ez duen kanpaina bati» ekin ziotela bikotekide ohiak eta haren bost lagunek. «Sekula frogatu ez diren» berari buruzko «akusazio faltsuak zabalduz» bizitza soziala egiteko aukerarik gabe utzi dutela adierazi du, ohikoak zituen lekuetatik kanporatu dutela, eta berari bakarrik ez, bere familiari eta lagunei ere kalte egin dietela.
Ondoren, haren gertuko hainbatek ere beren testigantza eman zuten, eta lauzpabost udal langilek ere bai, garai hartan udalaren Gizarte Zerbitzuetan aritzen ziren zenbaitek, besteak beste.
Hain zuzen ere, haien guztien argudioetan oinarrituta, zigor hauek eskatzen dituzte fiskalak eta akusazioak: bost urteko espetxealdia bikotekide ohiarentzat eta Zestoako alkate Mikel Arregirentzat (EH Bildu), eta lau urtekoa gainerakoentzat.
Saio luzea atzokoa
Epaiketaren aurreneko saioak luze jo zuen. 09:30ean zen hastekoa, baina 11:00k jo zituen ekiterako; prentsa ugari agertu zenez epaiketa egiteko prest zuten sala aldatu behar izan zutelako, besteak beste. Eta hasi eta gero ere, luze jo zuen epaiketak; 17:30ak jota, oraindik deklaratzen ari ziren.
09:00etarako 50 bat lagun elkartu ziren goizean epaitegiaren atarian, auzipetuei babesa emateko, Elkartasuna ez da delitua, zuekin gaude lelodun pankartaren atzean, eta handik minutu batzuetara sartu ziren akusatuak epaitegira.
Zestoako Mugimendu Feministako Maddi Lertxundik hedabideen aurrean adierazpenak egin zituen epaitegira sartu aurretik, eta hark salatu zuen «oso larria» dela elkartasun feminista epaitzea eta auzia iritsi den lekura iristea: «Zortzi urte hauek oso gogorrak izan dira, sei akusatuek espetxe zigorraren mamua lepoaren atzean eduki dutelako, eta sinestezina iruditzen zaigu gertatzen ari dena». Hark esan zuenez, gainera, kasuak argi uzten du sistema judiziala «heteropatriarkala» dela. Halaber, sei auzipetuei «indarra» eman zien, baita haiekin daudela adierazi ere: «Ez dugu pauso bat atzera egingo, hemen egongo gara bukatu arte».
Atzo ez ezik, igandean ere jaso zuten babesa auzipetuek, Zestoan izandako elkarretaratze handian.
