Ertzaintzak ikerketa bat hasi du atzo Ernai gazte antolakundeak Donostian egindako mobilizazioaren harira. Europa Press albiste agentziak jakinarazi duenez, atestatu bat ireki du desordena publikoagatik, eta jomugan jarri dute Felipe VI.a Espainiako erregearen figura bati burua moztu izana ere.
Ernaik milaka gazte bildu zituen Donostiako kaleetan. Faxismoari aurre egiteko «alternatiba integralak» sortzea defendatu zuten antolakundeko kideek, eta «askapen borrokara» batzeko deia egin zieten gazteei. Era berean, gogoratu zuten Espainia eta Frantzia direla Euskal Herriari «askatasunez bere etorkizunaz erabakitzeko» eskubidea ukatzen diotenak.
Horiek hala, manifestazioa egin bitartean, zenbait lagunek su eman zieten Espainiako eta Frantziako banderei. Aurretik, berriz, Bulebarrean ekimen bat egin zuten zenbait gaztek. Felipe VI.aren figura bat jarri zuten errepidean, eta, hura lurrera bota ostean, burua hautsi zioten mailu batekin.
Ez da Espainiako erregearen figuraren kontrako ekintzengatik halako ikerketa bat martxan jartzen den lehen aldia. 2020ko urriaren 12an Iruñean egindako mobilizazio batean, erregearen eta Kristobal Kolonen irudiak hautsi zituzten. Orduan, Espainiako Auzitegi Nazionalak auzia artxibatzea erabaki zuen.
