«Arazoa faxismoa da. Utzi euskal gazteria kriminalizatzeari». Esaldi hori duen kartel handi bat itsatsi du Ernai gazte antolakundeak bart gauean Gasteizen, Falange Espainola talde ultraeskuindarraren ekitaldiaren harira izandako gertakariak salatzeko. Andre Maria Zuriaren plazan itsatsi dute kartela, «kriminalizazio saiakera» salatzeko.
Falangeak Euskal Herria aukeratu zuen Hispanitatearen Eguneko bere ekitaldi nagusia egiteko, eta antifaxisten erantzuna izan zuten. Ertzaintza antifaxistei oldartu zitzaien, eta hemeretzi lagun atxilotu zituen. Ernaik salatu du ordutik «hainbat alderdik eta hedabidek» martxan jarri dutela «antifaxismoa kriminalizatu eta faxistei aurpegia garbitzeko operazio bat».
Izan ere, Ricardo Ituarte Eusko Jaurlaritzako Segurtasun sailburuordeak esan zuen «euskal faxistek» eragin zutela oldarraldia. Bingen Zupiria Segurtasun sailburuak, berriz, aipatu zuen «irudiek argi eta garbi» erakusten dutela «atzean zerbait antolatua» dagoela, eta «Falangearen aurkako Gasteizko deialdiaren helburua Ertzaintzari eraso egitea» zela.
Hori ikusirik, argi utzi du gazte antolakundeak: «Arazoa faxismoa da, eta arazoaren parte dira faxistei aurre egiten dieten gazteak jipoitzera polizia bidali eta azken asteetan gazteak kriminalizatzen ari direnak ere». Operazio hori amaitzeko eta euskal gazteak kriminalizatzeari uzteko exijitu dute.
