Arabako Fiskaltzak eta Espainiako Fiskaltza Nagusiko Giza Eskubideen eta Memoria Demokratikoaren Unitateak idatzi bat aurkeztu dute, Martxoaren 3ko sarraskiko gertakariak «zigorgabe» gera ez daitezen. Idatzi horretan proposatu dute auziari heltzeko borondatezko jurisdikzioa erabiltzea. Arrazoitu dute, akusatuen aulkian inor eseri gabe, helburu dutela 1976ko martxoaren 3an gertatutakoa argitzea eta «biktimei erreparazioa ematea», jazoera hura «Arabako memoria historikoaren parte» delako.
Aurten, 50 urte bete dira Martxoaren 3ko sarraskia gertatu zenetik. San Frantzisko Asiskoaren elizan bildu ziren zenbait langile 1976ko egun hartan, greba orokor baten nondik norakoak eztabaidatzeko. Espainiako Polizia Armatua elizara sartu zen, tiroka hasi zen, eta tiroek eta gas poteek eraikineko leihoak txikitu zituzten. Bost langile erahil zituzten, eta ehunka zauritu.
Fiskaltzaren arabera, bi prozedura judizial formalki abiatu zituzten arren, «gertakari larri horiek zigorrik gabe geratu ziren, ez baitzen ikerketarik egin». Ohar batean ziurtatu du informazio dokumental «andana» pilatu dutela, eta ikerketa sakona egin nahi dutela gertatutakoa argitzeko. Carmen Cotelo Arabako Fiskaltzako buruak hartuko du kasua, «daukan garrantzia» kontuan hartuta.
Borondatezko jurisdikzioa
Auziari heltzeko borondatezko jurisdikzioa erabiltzea proposatu du Fiskaltzak. Argudiatu du justiziarentzat «tresna baliotsua» dela, «estatu kolpearen, gerraren eta diktadura frankistaren biktimentzako». Fiskaltzaren esanetan, justiziak biktimak «gogobeteko eta erreparatuko dituen lehen aldia» izango da.
