Francesca Albanese NBEren Palestinarako kontalari bereziari emango diote aurtengo Giza Eskubideen Rene Cassin saria.
Eusko Jaurlaritzak abenduaren 10ean emango dio saria Albaneseri, Bilbon, EITBren Multibox aretoan.
Epaimahaiak «egiarekin eta ahulenak babestearekin» duen konpromisoagatik saritu du Albanese, kontuan hartuta bai «giza eskubideen defendatzaile» gisa egindako lana, eta bai haren «ibilbide profesionala eta independentzia». Gainera, azpimarratu du sariduna «oinarrizko eskubideen eta Nazioarteko Zuzenbide Humanitarioaren defentsan tinko» aritu dela.
Albanese da NBEren Palestinarako kontalari berezia izan den lehen emakumea. 2022ko maiatzetik dago karguan, eta Israelek egindako krimenak eta nazioarteko zuzenbidearen urraketak dokumentatzen ditu. Israel Gazan egiten ari dena «genozidioa» dela salatu du hainbat aldiz.
Urrian, Saharako Errepublika Arabiar Demokratikoaren Lagunen Elkarteak, Paz con Dignidad-OMAL elkarteak eta Euskal Herriko BDS plataformak Albaneseren hautagaitza aurkeztu zuten aurtengo Rene Cassin sarirako.
