Egungo gaztetxea udal liburutegi bihurtu nahi du Gernika-Lumoko Udalak, baina, oraingoz behintzat, ez du obrekin hasterik lortu. Izan ere, obra horiek egiteko enpresa gaur goizean zen eremura sartzekoa, baina Egurre gazte asanbladak agerraldira deitu zuen gaur goizerako, eta lanak hastea galarazi dute. Enpresako langileak ez dira eremura agertu, asanbladako kideen «presioak» eraginda.
08:00etan agertu dira kideak gaztetxera, eta, handik, Gernika-Lumoko Udalera abiatu dira, «negoziazio prozesu bat» abiatzeko asmoz. Salatu dute udalak ez diela «ofizialki» jakinarazi obrako langileak gaur ez zirela eraikinera joanen, eta ez dakitela gaztetxearekin zer gertatuko den: «Arrisku egoeran segitzen dugu, eta horrexegatik jo dugu udaletxera, udalagaz bilera bat eskatzera», erran dute kideek. Udalak atzo arteko epea jarri zien gaztetxea husteko.
Gero, udaletxearen barnean zirela, eserialdia egin dute, eta halaxe lortu dute, azkenean, udal ordezkariekin bilkura bat egitea. «Udala ez dago prest kanporatzea atzeratzeko», salatu dute handik atera berritan. «Ez du alternatibarik eman, eta, beraz, kaleratze arriskuan jarraitzen dugu».
Alderdien erantzunak
Nola EH Bilduk hala EAJk erantzun egin dute berehala: batak alde eta bertzeak kontra. Koalizio abertzaleak erran du «elkarrizketaren eta negoziazioaren bidea» babestu behar dela, eta herritar orok izan beharko lukeela «alkatearen bulegoa irekia». Hortaz, bi aldeak negoziatzera eta «irtenbide adostu bat» bilatzera gonbidatu ditu.
EAJk, berriz, larunbatean gertatutakoa salatu du. Asanbladako kide bat Gernika koadroaren muralaren aitzinean zintzilikatu zen, gaztetxearen aldeko aldarria zuen pankarta batekin. Jeltzaleek erran dute ez dela onargarria «herriaren sinboloan tankera horretako eraso bat» egitea. Eraikinaren erabilerari dagokionez, adierazi du «guztien mesederako» erabili behar direla herriko eraikin publikoak.
