Atzo epaitu zuten, Baionako auzitegian, 2024ko apirileko gertakarien harira: biak Baionako Louis de Foix lizeoan lanean ibiltzen zirela, Alexis Juret Fisika eta Kimika irakasleak bere lankideari eraso zion, materiala behar bezala prestatu ez ziolakoan; gizona, haserre, lankidea lepotik hartu zuen eskuekin. Fiskaltzak lau urteko kartzela zigorra galdegin du haren kontra, gibelapenarekin, eta azaroaren 20an emanen du epaimahaiak deliberoaren berri. Defentsak kargugabetzea eskatu du.
Ici Pays Basque irratiak agertu duenaren arabera, auzia publikorik gabe iragan da. Biktimaren auziko mintzaldia jaso dute: «Eskuak lepora ekarri zizkidan, biziki lasaiki, tinkatu gabe, eta lasaitzea galdegin zidan. Itzuli erdi egin, eta joan zen». Bere senarrarekin hitz egin, eta urte bat beranduago erabaki zuen salaketa ezartzea, pentsatuz agian itotzen ahalko zuela.
Jureten abokatuen ustez, «asmakuntza bat da» auziaren arrazoia, eta istorio horren beste azalpenik ez dago, Zacchelloren aferaren testuinguruan «erruduna betiko errudun» izendatzea ez bada.
Zeren salaketa testuinguru zabalagoan ulertzekoa da: Laure Zacchello urruñarra iazko ekainaren 20an desagertu zenetik, preso dago Juret; prokuradoreak ez du pistarik baztertu nahi, baina ezkor dago Zacchelloren zoriari buruz, eta Zacchelloren erailketa eta desagerraraztea egozten dio Jureti, hain zuzen. Behin-behineko atxiloaldian dago Mont-de-Marsango espetxean, Frantziako Landetan.
Senarrak bezala, 43 urte ditu Zacchellok; «ezkondua eta dibortzio bidean» da, Bourrier prokuradoreak zehaztu zuenez. Senarrak eta biek hiru haur dituzte, 5, 7 eta 9 urtekoak.
