Hizkuntza eskubideen urraketak jasotzen ditu Hizkuntz Eskubideen Behatokiak, eta urteotan «milaka» erregistratu dituztela gogoratu du gaur erakunde horretako zuzendari Agurne Gaubekak, Eusko Legebiltzarrean egin duen hitzaldian. Euskal Enplegu Publikoaren Legea erreformatzeko egindako proposamenen harira, hainbat aditu eta eragile ari dira hitza hartzen asteotan, eta, gaur, Gaubeka izan da hizlarietako bat. Gogoratu du herritarrek «ezintasunak eta oztopoak» izaten dituztela harremanak euskaraz izan nahi dituztenean administrazio publikoarekin, eta adierazi halakorik izan ez dadin beharrezkoa dela legea «errotik» aldatzea.
«Ehunka aldiz erantzun digu Eusko Jaurlaritzak hizkuntza eskubideak bermatzeko protokoloa eta irizpideak gogoraraziko zaizkiela langileei, baina, oraindik lanpostu askotan euskararen ezagutzarik ez dagoenez, irizpide horiek ezer gutxirako balio izaten dute», ohartarazi du. Horregatik argudiatu du «noranzkoa» aldatu behar zaiola egungo araudiari, eta euskaldunen hizkuntza eskubideak bermatzeko neurriak ezarri behar direla. Are, Gaubekak gogoratu du funtzio publikoak berebiziko garrantzia duela hor. «Euskara normalizatzea eta hizkuntza eskubideak bermatzea gizarte osoan gauzagarri izan dadin, administrazio publikoak eredu izan behar du».
