Inkomunikazioa amaitzeko eskatu dio Ameriketako Juristen Elkarteak Espainiari

Ameriketako Juristen Elkarteak «inkomunikazioa eta ezkutuko atxiloketak» eteteko eskatu dio Espainiako Gobernuari. «Salbuespen neurriak salbuespeneko egoeretan hartu behar dira soilik», azaldu du elkarteak.

Nazio Batuen Erakundearen Giza Eskubideen Kontseiluak otsailean eginiko bileran, Euskal Herriko agertoki berriaren aurrean izeneko testua aurkeztu zuen elkarteak. Idatzian, Espainiako Alderdien Legean agertzen diren «esan zehaztugabeak» berrikusteko, eta presoek etxetik gertu dauden espetxeetan egoteko eskubidea bermatzeko ere eskatu dio Espainiari.

Elkarrizketa eta negoziazioa

Amerikar Juristen Elkarteak irtenbide baketsuaren alde egin du, «elkarrizketaren eta negoziazioaren bidez, biolentziaren behin betiko amaiera bermatzeko». ETAk urtarrilaren 10ean iragarri zuen su-etena positiboki baloratu du elkarte horrek, baita «erakunde horrekin lotu ohi den gizartearen sektorearen erantzuna» ere.

Agertoki berriaren aurrean,«ekintzak» behar direla nabarmendu du elkarteak, eta gatazkaren amaiera «pertsona guztien giza eskubideen errespetuan» oinarritu behar dela iritzi dio.