Frantziako aireportuetako kontrolatzaileen sindikatu nagusiak, SNCTAk, greba abisua jarria zuen ostegun honetarako. Horien artean, Miarritzeko aireportukoek ere bai. Bizkitartean, zuzendaritzarekin akordioa erdietsi dutenez, greba deialdia kendu dute, baina hegaldiak jadanik ezeztatuak ziren. Miarritzen ez da hegaldirik izan barda, eta gaurko denak ezeztatuak izan dira, «hegazkin konpainiek jada ezeztatuak baitzituzten», Miarritzeko aireportuko komunikazio zerbitzuak jakinarazi duenez; «ezin zituzten berriz merkaturatu». Ryanair konpainiaren Bruselarako, Londreserako eta Dublinerako hegaldiak egitekoak ziren bakarrik, baina, dirudienez, horiek ere ezeztatu dituzte.
Apiril hastapenean, hegazkin konpainietako zuzendaritzek iragarri zuten aire kontrolatzaileen sailaren antolaketa erreformatuko zutela, eta horrek kontrolatzaileen kexua piztu zuen. Europako beste antolaketekin harmonizatzeko xedez abiatu aldaketa izan da. SNCTAk agiri batean iharduki zuen, eta salatu «probokazio bat» zela. Gau honetan, sindikatua ados jarri da zuzendaritzarekin, baina oraindik zehaztu gabea da zertan.
