«Hau ez da larrialdi humanitario bat bakarrik; isilik egoteak ez du sufrimendua bukaraziko». Duela bi hilabete egin zuen azken manifestazioa Gernika-Palestina plataformak, Palestinaren alde eta gerraren aurka egiteko, eta oraindik ere badauzka arrazoiak kalera ateratzeko. Horrexegatik, bertze mobilizazio batera deitu dute ortzegunerako, Bilbon, beste zenbait elkarterekin batera; elkarretaratze bat izango da, Palestinako egoera «normalizatzen» ari den honetan «genozidioa berehala amai dadila» eskatzeko.
Baina deitzaileek ez dute aldarri bat bakarrik: exijituko dute eten ditzatela enpresek Israelekin dauzkaten harremanak, egin dezatela okupazio ilegalaren kontra, eta sala dezatela inpunitatea. «Laguntza humanitarioak ezin du itxaron, berehala sartu behar du, eta guzion ardura da hori eskatzea», erran dute antolatzaileek, protesta iragartzeko prentsaurrekoan.
Hainbat elkartek deitu dute elkarretaratzera: horien artean dira, besteak beste, Gernika-Palestina plataforma, Ongi Etorri Errefuxiatuak, Begirune, Gerrarik ez, eta Pertsonalde taldeak. Manuel Lezertua EAEko ararteko ohia ere izan da gaurko agerraldian, eta gogorarazi du gerra hasi zenetik Israelgo Gobernuak 72.000 lagunetik goiti hil dituela Palestinan. Halere, azpimarratu du ortzeguneko mezua ez dela Palestinara soilik joanen, baizik baita Libanora eta Zisjordaniara ere. «Zisjordanian, aurten, 580 erasoaldi egin dituzte kolonoek, eta 2025etik gaur arte 33.000 pertsona behartu dituzte desplazatzera», erran du. Libanori dagokionez, azaldu du ia milioi bat lagun daudela desplazatu behar izateko arriskuan.
«Datu horiek guztiak ikusita, gizarteari eskatu nahi diogu batu dadila gure aldarrietara, betebehar bat baita okupazioaren eta genozidioaren kontra altxatzea», gehitu dute antolatzaileek. 19:00etan hasiko da elkarretaratzea, Bilboko Plaza Biribilean, eta hantxe bertan irakurraldi bat eginen dute, Franja de Gaza Sol Banden musikaz lagunduta.
