Ratioak txikitzeko herri ekimen legegileari ezezkoa eman dio Nafarroako Gobernuak. Ikastetxeak behar bezala prestatzeak eta irakasle gehiago kontratatzeak «kostu neurrigabea» izanen lukeela argudiatu du Maria Txibiteren kabineteak, Nafarroako Parlamentura igorritako txostenean. Maiatzaren 13an erregistratu zuten herri ekimen legegilea Nafarroako Hezkuntza Publikoaren Aldeko Plataformak, Nafarroa 0-3 plataformak, Ratioak Jaitsi 0-18 elkarteak eta Sortzen federazioak. Helburua zen gobernua behartzea ikasle ratioak legez murriztera, hezkuntza publikoko etapa guztietan. Bihar zuen azken eguna Nafarroako Gobernuak, aldeko edo kontrako irizpena emateko. Eta azkenerako, kontra egin du.
Ikusi gehiago
Gaur aztertu dute gaia Nafarroako Parlamentuko Mahaian eta Eledunen Batzordean. Gobernuaren txostenean jasota dago, xehe-xehe, ratioa txikitzeak izanen lukeen kostua: 193 milioi euro, guztira. Inbertsio hori nola banatuko litzatekeen ere esplikatu dute.
Nafarroako Gobernuak jakinarazi duenez, ikasgela bakoitzean ikasle gutxiago egoteak ekarriko luke ikastetxe publiko guztiak berregituratzea: 784 talde sortuko lirateke Haur eta Lehen Hezkuntzan, DBHn, Batxillergoan eta Lanbide Heziketan. 96,5 milioi euroren kostua izanen luke horrek.
Itunpeko ikastetxeei dagokienez, 729 talde sortuko lirateke, eta 1.074 irakasle beharko lituzkete. 73,6 milioi euro inbertitu beharko lituzkete horretan. 0-3 zikloan, azkenik, 560 unitate berri ireki beharko lituzkete, ratioa murrizteko, eta hortaz, beste horrenbeste hezitzaile kontratatu beharko lirateke. Kostua 23 milioi euro ingurukoa izanen litzateke, gobernuaren arabera.
Herri ekimen legegilea atzera botatzeko argudioen artean, gobernuak dio sustatzaileek ez dutela aurkeztu ratioak «era progresiboan» txikitzeko biderik. Uste dute ratio berriak automatikoki aplikatu beharko liratekeela, egun batetik bestera, eta horrek hezkuntza arduradunak behartuko lituzkeela ikasgelak eta taldeak bikoiztera. Gobernuak gaineratu du, bestalde, eraikinei eta baliabideei ere eginen liokeela proposamenak, espazioak handitu beharko lituzketelako.
Deia parlamentuko taldeei
Hezkuntza Publikoaren Aldeko Nafarroako Plataformak bazuen gobernuaren asmoen berri. Aurreko astean Iruñeko Plazara gunean eginiko agerraldian adierazi zuten «litekeena» zela gobernuak ezetz esatea. Hori horrela, Nafarroako Parlamentuko taldeei dei egin zieten, ekimena tramitatzeko bidea ireki zezaten. Izan ere, plataformako kideen ustez, parlamentuko Mahaian eta Bozeramaileen Batzordean ordezkaritza duten alderdiek aukera dute gobernua nolabait behartzeko, herri ekimen legegilea tramitatzearen alde eginda: «Tramitatu dezatela. Utz diezagutela sinadura bilketa abiatzen, eta, ondoren, bozkatu dezatela alde edo kontra. Hori bai, ez dezatela, inondik inora, eztabaida demokratikoa saihestu».
Tramitazioa behin betiko oztopatuko balute, plataformak ez du baztertu auzitara jotzea edo mobilizazioak antolatzea. Herri ekimen legegile bat «justifikazio sendorik gabe» atzera botatzea «antikonstituzionala» izan daitekeela esan zuen plataformako ordezkari den Laura Perez Ruanok: «Kasu horretan, kalera aterako ginateke».
