Beste urrats bat, helduen euskalduntzearen doakotasunerako bidean. Nafarroako Gobernuak inoiz baino diru laguntza handiagoak emanen dizkie aurten euskara ikastaroren bat egiten dutenei, eta oinarrizko A1 mailan egin dute azpimarra: matrikularen kostuaren %100 arte itzuliko diete ikasleei. Nafarroako Gobernuko lehendakariorde eta Memoria eta Bizikidetza arloko, Kanpo Ekintzako eta Euskara arloko kontseilari Ana Ollok eman du horren berri, Euskara ahora kanpaina instituzionalaren aurkezpenean.
Harekin batera, ekitaldian izan dira Aitor Larraza Sakanako Mankomunitateko lehendakaria; Beatriz Buldain eta Xabier Garcia Castell AEK-ko kideak; Ainhoa Madariaga Zubiarte euskaltegi publikoko ordezkaria; Joxerra Olano, Iker Mundiñano eta Aitziber Garralda IKAko ordezkariak; eta Carol Saez de Albeniz eta Santi Leone, Iruñeko Hizkuntza Eskola Ofizialaren izenean.
Kontseilariak esplikatu duenez, 5.500 pertsona ari dira euskara ikasten Nafarroako euskaltegi, hizkuntza eskola eta gainerako ikastegietan, 2024-2025eko ikasturteko datuen arabera. Azpimarratu du, dena den, gobernuaren helburua dela kopuru hori handitzen jarraitzea, eta horretarako ahalegina eginen dutela «bertako herritarrak eta etorri berriak euskarara erakartzen segitzeko». Estrategia horren barruan kokatu du diru laguntzak handitzeko erabakia.
Lehen urratsak, dohainik
Izan ere, Euskarabideak 560.000 euro jarriko ditu aurten helduen euskalduntzea diruz laguntzeko. Iaz baino 210.000 euro gehiago dira —%60ko igoera—. «Euskara ikastaroen zenbait modalitate lagunduko ditugu, hala nola iraupen laburreko ikastaroak, familien barnetegiak eta euskaltegiek egiten dituzten eskaintza berriak», azaldu du Euskarabideko zuzendari Jabi Arakamak agerraldian.
Euskara ikasteko bidean lehen urratsak egin nahi dituzten ikasleei eman diete lehentasuna; hau da, aurten A1 maila eginen duten ikasleei. «Euskarabideak %100era arteko laguntzak emanen ditu maila horretan. Gainontzeko mailetan, 475 eurora arteko diru laguntzak jaso ahal izanen dituzte aurrez aurreko ikastaroetan, eta laguntza horiek bateragarriak izanen dira toki entitateek ematen dituzten laguntzekin», azaldu du gobernuak. Laguntza bi epetan ordainduko da: lehen zatia, abenduan, eta bigarrena, ikasturtea amaitzean. Ikasleek bi baldintza bete beharko dituzte dirua jasotzeko: batetik, ikastaroaren matrikula aurretik ordaintzea, eta, bestetik, eskoletara joan izanaren agiria aurkeztea.
Gizarte ekimeneko euskaltegien izenean, Beatriz Buldain AEKren ordezkariak herritarrak animatu ditu euskaltegira jotzera: «Bertan, dohainik edo ia dohainik ikasteko aukera izanen duzu, egunerokoan euskaraz bizi ahal izateko trebatuko zaituen metodologia komunikatiboaren bidez, eskarmentu handiko irakasleen laguntzaz, giro atseginean». Nabarmendu du euskaltegiek bost hamarkada daramatzatela Nafarroan euskara irakasten, euskarazko hiztunak sortzen, nafarrak euskaraz bizi daitezen bultzatzen eta euskarazko kultura zabaltzen.
Aurtengo kanpaina
Aurreko urteetan bezala, Euskara ahora izena eman diote helduen euskalduntzea sustatzeko kanpaina instituzionalari. Kanpaina antolatzeko tenorean, 34 toki entitate eta euskara irakaskuntzaren alorreko eragileak aritu dira Euskarabidea institutuarekin elkarlanean: Zubiarte euskaltegi publikoa, hizkuntza eskola ofizialak, eta AEK, IKA eta Bai&by sareetako euskaltegiak.
Sustapen kanpainak irail osoan iraunen du. Horretarako, iragarkiak txertatuko dituzte sare sozialetan, autobus geltokietako markesinetan, Nafarroako Unibertsitate Publikoan, egunkarietan eta tokiko aldizkarietan; eta eskuorriak ere banatuko dituzte. Aurten, gainera, hizkuntza gehiagotan emanen dute informazioa. Hala, euskaraz eta gaztelaniaz ez ezik, ingelesez, frantsesez, arabieraz eta bulgarieraz ere argitaratuko dituzte iragarkiak: «Xedea da jatorria kanpoan duten herritarrak ere erakartzea».
