Helduen euskalduntzea doakoa izatea, horra Euskarabideak bere buruari ezarriak dizkion helburu nagusietako bat. Aurten, urrats garrantzitsua egin dute bide horretan: matrikula «doan edo ia doan» aterako zaie A1 mailan ari direnei.
Ikusi gehiago
Aspaldiko xedea da doakotasunarena.
Bai, 2015az geroztik bederen. Urte hartan, gobernuak ez zuen diru sailik jarri helduen euskalduntzerako [UPN zegoen agintean], eta hurrengo urtetik aurrera hasi zen gero eta diru gehiago horretara bideratzen. Urtetik urtera handiagoa izan da helduen euskalduntzea finantzatzeko diru saila.
Aurten, igoera dezente handiagoa izan da.
Hala da. Iaz baino 210.000 euro gehiago eman ditugu, %60ko igoera, eta hori izan da aurtengo berritasunetako bat. Baina laguntzak banatzeko modua ere ezberdina da: orain arte, era linealean banatzen genuen dirua, maila guztien artean. Orain, aurrekontuaren igoeraren zati handi bat erabiliko dugu A1 mailaren doakotasuna lortzeko.
Hortaz, euskalduntzea erabat doakoa izanen da maila horretan?
Hori da helburua, baina ezin dugu erabat ziurtatu. Deialdi publikoa izanik, ezin da beste era batera izan: guk aldez aurretik finkatu behar dugu diru sail bat, eta uste dugu horrekin nahikoa izanen dela A1 mailaren doakotasunera iristeko, baina demagun ikasle kopurua izugarri handitzen dela aurten. Hala balitz, agian ez ginateke doakotasun osora iritsiko, baina oso gertu geldituko ginateke.
Zer gertatuko da gainerako mailekin?
Horietan ere laguntzak handitu ditugu, eta ia 500 euro itzuliko ditugu matrikula bakoitzeko. Gainera, euskaltegietako ikasleek ez ezik, hizkuntza eskola ofizialetako eta Zubiarte euskaltegi publikoko ikasleek ere aukera izanen dute laguntza bat jasotzeko.
Zeintzuk dira laguntza jasotzeko baldintzak?
Guk eskatzen dugun bakarra da matrikula ordaindu izanaren agiria aurkeztea eta, gutxienez, eskolen %80tara bertaratzea. Ez da beharrezkoa ikastaroa gainditzea.
Eta aurrerantzean, zer?
Bide luzea dugu aurretik, baina argi dugu nora iritsi nahi dugun. Badugu kronograma bat, eta gure asmoa da datozen urteetan doakotasuna hedatzen segitzea: aurten A1 mailan, hurrengoan A2an, gero B1ean... Horrela, urtez urte, helburua lortu arte.
