Palestinarekin Elkartasuna plataformak mobilizazioak antolatu ditu Gasteiz, Donostia eta Bilboko aste nagusietan, baita manifestazio nazional bat ere, Iruñean. Mendebaldeko enpresek eta gobernuek «genozidioarekin negozioa» egiten dutela salatu dute, eta erakundeen «hipokrisia» nabarmendu. Horregatik, manifestazioetara batzeko eta Palestinari elkartasuna erakusteko gonbita zabaldu dute.
Lehena Gasteizen izango da, abuztuaren 6an, 19:30ean; Aldabetik hasiko da. Hurrengoa Donostian antolatu dute, abuztuaren 10ean —19:00etan Bulebarrean—; Bilbokoa abuztuaren 15ean izango da —19:00etan Plaza Eliptikoan—; eta Iruñeko manifestazio nazionala urriaren 4an izango da.
📢 Azken asteotako egoera oso larria da: planifikatutako gosetea muturtzen ari da, eta bitartean, anexioarekin eta kontzentrazio esparruekin mehatxatzen ari du Israelek.
— Palestinarekin Elkartasuna (@Palestinarekin) August 3, 2025
Jaietan ere mobilizatzera dei egiten dugu, eta urriaren 4an manifestazio nazionala egingo dugu Iruñan.
📃👇 pic.twitter.com/5jdxeax1Z0
Mobilizazioek hiru aldarri izango dituzte oinarri. Alde batetik, palestinarren erresistentziari «baldintzarik gabeko babesa» erakutsiko diote; bestetik, Palestinaren askatasuna lortzeko «Israel suntsitu» beharra dagoela defendatuko dute; azkenik, Israelekin «harreman guztiak» eteteko eskatuko dute. Hori guztia lortzeko, konpromisoa hartu dute «antolakuntza internazionalista sortzen eta zabaltzen jarraitzeko».
Gazan gosez hiltzen ari direnen irudiek eta datuek izan duten oihartzuna azpimarratu dute: «Orain arte ez dugu horrelako kezkarik ikusi hamarnaka mila heriotzengatik». Plataformak hedabideei leporatu die horiek argitaratuz «gainetik kendu nahi izatea Israeli aurpegia garbitzearen erantzukizuna». Gaineratu du hainbat estatuk ere «itxurazko kezka» adierazten dutela eta «babes sinbolikoa» ematen dutela.
«Gosetea planifikatua izan da, eta duela bederatzi hilabete jendaurrean iragarri zuten, Rafahko pasabidea erabat itxi eta ura, janaria, erregaia eta elektrizitatea sartzea galarazi zutenean»
PALESTINAREKIN ELKARTASUNA PLATAFORMA
Palestinarren gosetea «planifikatua» izan dela uste dute protestak antolatu dituztenek, duela bederatzi hilabete Rafahko pasabidea itxi baitzuten, eta horrek ura, janaria, erregaia eta elektrizitatea iristea galarazi baitu. Esan dute, gainera, laguntza iristen denean hori jasotzera joaten direnak tirokatu egiten dituztela «mertzenario estatubatuar eta israeldarrek». Adierazi dutenez, Israelen su etenaren akordioak zera du baldintza, 600.000 palestinar kontzentrazio esparru batean biltzea hegoaldean, gero beste herrialde batzuetara kanporatu ahal izateko.
Ez da hori izango Bilboko Aste Nagusian Palestinaren alde egingo den ekintza bakarra. Hainbat txosnak ez dute Coca-colarik salduko, Palestinako lurralde okupatuetan dagoelako produktu hori sortzen duen lantegi bat.
