Badago zalantza, eta badago jakin-mina: goizeko negoziazio mahaiaren ostean, 15:30 aldera berriro biltzekoak dira Eusko Jaurlaritzako Hezkuntza Saila eta sindikatuak. Arabako, Bizkaiko eta Gipuzkoako hezkuntza publikoko irakasleentzat lan akordio berri bat lortzea dute xede, datorren asterako deituta dituzten bost greba egunak bertan behera uzteko. EH Bilduk galdetuta, auzia izan du hizpide gaur goizean Imanol Pradales Eusko Jaurlaritzako lehendakariak. Ziurtatu du azken unera arte saiatuko direla negoziatzen: «Asteleheneko 08:00ak arte egin dezakegu akordioa; hobe gaur bihar baino, baina ez dadila izan azken unera arte ez saiatzeagatik».
Ikusi gehiago
Ziurtatu du Hezkuntza Sailak baduela akordioa lortzeko borondatea, eta, bide hori urratze aldera, sindikatuei arduraz jokatzea galdegin die: «Benetan hobetuko al ditugu ikasleen emaitzak greba eginez eta hezkuntza publikoa geldituz ikasleentzat erabakigarria den garaian?».
Horiek horrela, zera nahi du lehendakariak: «negoziatzeko borondatea» eta «marra gorririk gabe» aritzea, erdigunean hezkuntza publikoa hobetzea jarriz eta ez «beste helburu batzuk». Jarrera hori izanez gero, baikorra da Pradales: «Akordioa posible da».
