Ipar Euskal Herriko sei parlamentariek Elisabeth Borne Frantziako Hezkuntza ministroari dei egin diote, heldu den ikasturterako Seaskari emandako baliabideak berrikusi ditzala eskatzeko. «Kezka handia» agertu dute, ikastoletarako aurreikusi dituzten postuak «aise gutxiegi» direlako ikasle kopuruaren arabera. Ikastolen elkarteak protesta eginen du bihar Baionan, «irakasle postuak eta mespretxu gutxiago» eskatzeko.
Ikusi gehiago
Hiru diputatuek eta hiru senatariek izenpetu dute gutuna, hau da, Peio Dufau, Colette Capdevielle eta Iñaki Etxaniz diputatuek, eta Max Brisson, Frederique Espagnac eta Denise St Pee senatariek.
«Harridura» erakutsi dute, ministroaren kabinetearekin apirilean izan zituzten «elkarrizketa eraikitzaileen kontrakoa» delako Seaskak Paristik jaso duen erantzuna. «Ulertzen ditugu erantzun horrek ikasleen, haien familien eta irakasleen artean sortzen duen larritasuna eta kezka. Euskarazko murgiltze sarearen ikasketa baldintzak eta funtzionamendu egokia zuzenean arriskuan ezartzen ditu», adierazi dute.
Seaskarekin bat eginez, sei parlamentariek adierazi dute «bereziki kezkagarria» dela kolegioetako egoera, ikasgela batean baino gehiagotan «gehiegizko kopuruak» izanen dituztelako. Halaber, 33 ikastolatan baliabide gehiago ez eman izana ere deitoratu dute. «Funtsezko postu horiek gabe, ez dira beteko kalitatezko irakaskuntzaren gutxieneko baldintzak, ez ikasleentzat eta ez irakasleentzat».
Seaska, «funtsezko partaide»
Parlamentariek azpimarratu dute Seaska «funtsezko partaidea» dela euskararen aldeko hizkuntza politikan: 4.300 ikasle ditu 39 ikastetxetan, hau da, Ipar Euskal Herriko ikasleen %9. «1994an François Bayrou orduko Hezkuntza ministroarekin [Frantziako Lehen ministroa da gaur egun] elkarte kontratua izenpetu zuenetik, hezkuntza zerbitzu publikoan osoki parte hartzen du», adierazi dute.
Euskararen «egoera berezia» kontuan har dezala eskatu diote Frantziako Hezkuntza ministroari, eta galdetu heldu den ikasturterako aurreikusitako lanpostuak berrikusteko eta berriak sortzeko «politika boluntarista» izan dezala.
