Apirilaren 14an Ziburuko hotel bateko bosgarren solairutik erori zen emakumearen auzian, bere buruaz beste egiteko saiakera bat izan daitekeela uste du Baionako prokuradoreak. «Pertsona horrek aurrekari psikiatrikoak eta joera suizidak izan dituela ikusirik, hipotesi horri buruz goaz», baieztatu du Jerome Bourrier fiskalak. Horiek horrela, «hilketa saiakeragatik» abiaturiko ikerketa aitzina doala erran du, zuhurki, «eta oraindik hetsigabea» dela.
Emakumea erori orduko, harekin gela berean zen bizilaguna atxilotu zuten, eta galdeketapean atxiki bi egunez. Azkenean, aske utzi zuten, zaintzapean. Ospitalera larri eraman zuten emakumea, eta, geroztik, galdekatu ahal izan dutela erran du prokuradoreak, baina ez dute deus argirik atera. Haren erranetarik, bizilagunak ez daukala «zerikusirik» hauteman bide dute inkesta egileek, baina, emakumeak erorikoaz «oroitzapenik ez duenez, zaila da erabat erratea bizilagunak ez duela batere zerikusirik».
Bourrierek erran du ikertzen segitzen dutela argitasun gehiagotara heltzeko xedez.
