Sumar Mugimenduak iritzi dio «marketin hutsa» direla Imanol Pradales Eusko Jaurlaritzako lehendakariak Eusko Legebiltzarreko politika orokorreko bilkuran egin zituen proposamenak. «Ezer aldatuko ez duten» iragarpenak direla esan du Alba Garcia idazkari nagusiak, eta «aldaketak» eskatu ditu.
Sumarrek Bilbon egin du bilera, abiatu berri den urte politikorako bide orria zehaztu eta adosteko. Mugimenduak hiru lehentasun ezarri ditu: «Ziurtasunak zabaltzea, bidezko trantsizio ekologikoa bultzatzea eta ekonomia demokratizatzea». Horrez gain, iragarri du «ezkerreko fronte zabal bat» eraikiko dutela proposamen horiek martxan jartzeko.
Egungo testuinguru politikoaren inguruko diagnostiko bat ere onartu dute bileran. Txosten horren arabera, egungo eredua «agortuta» dago, eta Araban, Bizkaian eta Gipuzkoan «beste garai bat» behar da. Adibide gisa jarri ditu, hain justu ere, Osakidetzaren egoera, etxebizitzaren arazoa, hezkuntzaren «pribatizazio prozesua», fiskalitate «bidegabea» eta «multinazionalen mesedera egindako energia politikak».
Era berean, EAEko estatutu berria «hurrengo hamarkadako erabakirik garrantzitsuenetako bat» izango dela uste du Sumarrek, eta zehaztu du «jarrera eraikitzailearekin baina irmotasunez» negoziatuko duela. Izan ere, iritzi dio soilik hark bermatu dezakeela «ekosozialismoa, feminismoa, arlo publikoaren defentsa eta bizitzeko eskubidearen balioak» testuan jasotzea.
