Eklipsea ikusteko betaurrekoak prest dituzte askok jada, baina hura ikusteko bidean kontuz ibiltzeko eskatu dute Nafarroako Osasun Publikoaren eta Lan Osasunaren Institutuak eta Euskalmetek. Izan ere, Nafarroan osasun alerta dago beroagatik, eta bereziki arrisku handiena dutenak babestea gomendatzen da: 65 urtetik gorakoak, 4 urtetik beherakoak, haurdun dauden emakumeak, langileak, eta gaixotasun kronikoak dituzten pertsonak. Iragarpenen arabera, 39 gradu inguru izango dira Nafarroa erdialdean.
Horregatik, Osasun Departamentuak ur asko edatea gomendatzen du, maiz eta egarri izan gabe. Komeni da, halaber, edari alkoholdunik, kafeinadunik eta azukredunik ez hartzea. Eguzkitik babesteko, txanoa edo kapela eramatea ere gomendatu dute, eguzki krema eta arropa zabalak erabiltzeaz gain. Haizemaileak eskura izatea ere aholkatu dute, eta posible bada leku freskoak edo itzalekoak bilatzea.
Araba, Bizkai eta Gipuzkoarako ere tenperatura beroak espero dira. Euskalmeten arabera, eklipseak iraun artean, 19:30etik 21:30era, zerua oskarbi egongo da; halaber, ez da ia lainorik egongo. Araban egingo du berorik handiena: 32 eta 33 gradu artean hasieran, eta 27-28 bukaeran; Bizkaian, berriz 26 gradu inguru izango dira, eta antzera Gipuzkoan.
Suteak pizteko arriskua
Beroaren ondorioz, sute arriskua handiagoa da. Aemet Espainiako meteorologia agentziak jakinarazi duenez, suteen arriskua «oso handia» edo «muturrekoa» da ia Nafarroa osoan. SOS Nafarroak suteak eragin ditzakeen edozein jarduera saihestea gomendatu du, eta, sutea piztuz gero, 112ra lehenbailehen deitzea. Suterik bada, ebakuatzea ezinbestekoa da: egokiena eremu irekietara jaistea da, hala nola bide eta errepideetara, edo jada erreta dauden eremuetara.
Bestalde, Nafarroako Gobernuak aholku batzuk eman dizkie eguzki eklipsea ikustera joango diren herritarrei: ez da komeni landarediaren gainean aparkatzea, motorraren beroak sua piztu baitezake; barbakoarik ez da egin behar, eta ez da zigarrorik landa lurrera bota behar. Era berean, eguzkitan kristalezko botilarik eta hondakinik ez uzteko eskatu dute.
Gaztelugatxe, itxita
Eklipsearen harira, Gaztelugatxeko bi sarrera ixtea erabaki dute Bizkaiko Foru Aldundiak eta Bakioko eta Bermeoko udalek (Bizkaia); zehazki, Urizarretatik eta Ermutik iristeko bideak itxiko dituzte. Jakinarazi dutenez, helburua da bisitarien «segurtasuna» bermatzea, eta Gaztelugatxeko «natura ingurunea babestea».
Hain justu, espero da jende mordoa joatea eremu horretara eklipsea ikusteko asmoz. Bisitei dagokienez, goizean soilik joan ahalko da, eta aurretik horretarako sarrera eta txanda hartuta.
