Kanpoan, euria jaits ahala eta haizea marrumaz ari denean, ohean sartzen gara ordenagailuarekin, izpirituak hustu asmoz. Mezuetan, landare ongileei buruzko publizitate inspiragarriak jasotzen ditugu: hostoak, loreak, erroak denak on dira tisana zaporetsuak egiteko. Hurrupa bat eta ongi sentitzen gara, lasaituak, barnez berotuak, munduarekin bake-agiriak izenpetzeko prest!
Ingurunearen etorkizunarekiko beldurra zainetan sartzen zaigu haatik, ikasten dugularik Omnibus X legea eztabaidatuko dela datorren abenduan zehar Europako Parlamentuan: honen arabera pestizidarik kutsakorrenak eta osagarriarentzat larrienak epe-mugarik gabe erabiltzen ahalko dituzte nekazaritza alorrean. Ekai kimikoak hegazkinez eta dronez hedatzeko dretxoa ere balukete. Bistan dena, natura-zaintza elkarteak kontra dira, neurri horiek bizitzaren azkentzea ekar lezaketelako. Baina aurkariak ikusezinak bilakatuak dira, errentagarritasunaren eta arauen sinplifikatzearen aitzakian.
Horrelako berriak irakurtzean, egia da, xarpota-txarpoil infusio ongilea edatea ez dela aski zainak jabaltzeko. Ala bai?