Denborak aldatu dira. Beharrik! Hori neukan gogoan Andoaingo Rikardo Arregi Kazetaritza Saria banatu zen arrastiri hartan. Hasteko, zorionak irabazleei, ongi erakusten dutelako iparralde honetan ere, badirela kazetaritzaren eta komunikazioaren alorrean gogor ari diren langileak... ahantzi gabe Jakoba Errekondo agurtzea hemendik beretik, baratzearen maitasuna gurekin partekatu zuelako. Eta gero, azpimarratuko nuke, urtean behin, hain premiazkoa dugun euskal eta euskarazko prentsaren mirail baten gisa irekitzen dela Andoaingo ekitaldia.
Sari ematearen ondoko aperitif-petits fours saioa ere ez da batere gaizki. Sarituen familiak gurutzatzen dira, irratietako edo egunkarietako betiko lagunak, aspalditik ezagutzen ditugunak edo doi-doia izen bihurtzen ari diren etorkizun handiko kazetariak. Bada halako poztasun bat airean, libertate aierua solasaldietan, euskal munduen eta aburu ezberdinen nahasketa zerbait, hitz egitea, idaztea eta iritziak trukatzea garrantzitsua baita jendarte egiteko.
Arantxa, aurkitu al zenuen zure senarra jendetza alai horren erdian?
