Azaroaren 19an, 10:51tik aitzina urte bukaera arte, emazteak urririk ariko dira lanean, Europar mailako gizonezkoen eta emakumezkoen soldata arrakalaren arabera. Eurostat erakundearen zenbakiek agertzen dute argiki emazteen hilabete sariak gizonezkoenak baino % 11,1 apalagoak direla. Gloriosak paristar talde feministak du kalkulu hau egiten 2016az geroztik.
Azken manifestaldietan ikusi kartoi bateko aldarrikapenak hausnarra urratu didala aitor dut: «Zakil bat bilatzen dut soldata hobeago baten trukean!». Hitz gordinak behialako errealitatea salatzeko. Diru gehiagok erran nahi baitu, neurri batean, askatasun gehiago premiazko zereginak konplitzeko orduan. Bi ardatz aipatzen dira egoeraren aldatzeko: batetik, enpresak berdintasuna egiaztatzera behartzea, eta bestetik, nagusiki emakumeek betetzen dituzten enpleguen ordainketak ber kontsideratzea.
Arrakala txikitzen dabil, baina Europa itoko duen eskuin muturraren oldearekin hobekuntza menturak oro kalenda grekoetara aurtikiak izateko beldurra bada, eskuineko ideologoentzat emaztearen lekua etxeko sukaldea delako -eta ohea alaina!
