Prebarikazio uhinak

Nafarroako Gobernuak euskararekiko eta euskal komunitatearekiko daukan herra historikoaren sinboloa da Euskalerria irratia. Herra horren zentzugabekeria agerikoa da euskaldunentzat, baina baita Nafarroako Gobernuak hainbeste errespetatzen dituen epaitegientzat eta justiziarentzat ere. Zer gehiago behar du orain Nafarroako Gobernuak Euskalerria irratiari lizentzia emateko? Edo, gutxienez, lehiakideen baldintza beretan lehiatzen uzteko? Espainiako Auzitegi Gorenak berretsi egin du Nafarroako Auzitegi Nagusiaren sententzia, eta indarrik gabe utzi du 1998ko lizentzia banaketaren bigarren fasea. Auzitegiek jada hiru aldiz esan dute arauz kanpokoa izan zela fase hori: Nafarroako Gobernuak lizentziak eman zizkien Net 21 irratiari eta Opus Deiren irratiari, Euskalerria irratiak baino puntu gutxiago zituzten arren.

Prebarikazioa da agintariren batek erabaki bat hartzea jakinda erabaki hori bidegabea dela. Nafarroako Gobernuak asko daki prebarikazioaz. Baita inpunitateaz ere.