Euskalgintzaren gaineko zurrumurru neonaziak

Unai Apaolazak halaxe bota du 'Berria' egunkariko artikulu batean, 2023ko irailaren 23an: «Euskalgintzan zabaltzen ari da Ordezkapen Handiaren marko neonazia». Baina artikulu guzian ez dago froga, datu edo zehaztapen bakar bat ere. Zer diskurtso da hori? Euskalgintzako zer eragilek bota du? Non eta noiz? Hala, ez dago aukerarik datuak egiaztatzeko, ez dago aukerarik defentsarako, ez dago aukerarik ideia horri arrazoia emateko edo kontra egiteko. Baina susmoaren itzala zabaldu du. Frogarik gabeko zurrumurruak zabaltzeak ez du zerikusirik kritika politikoarekin. Naziez ari garela, gogora ekartzen ditu Goebbelsen propagandaren printzipioak.