Urriaren 10ean menia indarrean sartu arren, odolusteak ez dauka etenik Gazan: «Israelek palestinarrak bonbardatzen, hiltzen, setiatzen eta kolektiboki zigortzen jarraitzen du», Arkaitz Rodriguez EH Bilduren Ekintza Politikoko idazkariak ohartarazi duenez. Haren ustez, inoiz baino beharrezkoagoa da genozidioa salatzen eta herri palestinarraren eskubideak defendatzen segitzea. Hori dela eta, larunbatean Gure Esku, Gu Ere Bai eta Gernika-Palestina plataformek deitutako kalejiran parte hartzeko deia egin dio euskal gizarteari.
Euskal Herriko eta Palestinako selekzioek jokatuko duten partidaren atarian egingo dute mobilizazioa hiru eragile horiek, 17:30ean, Arriaga antzokitik San Mamesera. Eta EH Bilduk kalejirarekin bat egin du. Rodriguezek gogorarazi duenez, «egin den apurra herriaren presioari esker egin da»: «Horregatik, mobilizatzen jarraitu behar da, gobernuak presionatzen eta Israel isolatzen».
Palestinari elkartasuna adierazteko mobilizazioetan «Euskal Herria erreferente» izan dela nabarmendu du EH Bilduko ordezkariak, eta gogora ekarri du Bilbon Espainiako Itzuliko etapa geldiaraztea lortu zela. Gauzak horrela, larunbateko partidan zein kalejiran ere «modu masibo, baketsu, alai eta aldarrikatzailean» parte hartzera deitu ditu herritarrak: «Palestinaren alde beste gol bat sartu behar dugu».
Ofizialtasuna
Euskal Herria, Palestina bezala, nazio bat dela ere gogorarazi du Rodriguezek: «Nazio horrek selekzio ofizialak izateko eta bere etorkizuna askatasunez eta demokratikoki erabakitzeko eskubidea du». Ildo horretan, EH Bilduko ordezkariaren ustez, «ez da kasualitatea Palestinarekin solidarioak izatea». Rodriguezen hitzetan, «Euskal Herria ere herri ukatua, zatitua eta zapaldua da. Haren kausa gurea da, munduko herri zapaldu guztien kausa».
