Euskal Herrian bizi diren zenbait palestinar bildu dira gaur goizean San Mames parean, Bilbon, eta herritarrei dei egin diete datorren larunbatean Palestinaren aldeko elkartasun martxan parte hartzera. Hain zuzen, orduan jokatuko dute futboleko euskal selekzioak eta Palestinakoak elkarren arteko norgehiagoka, eta hori baino lehen manifestazioa egingo dute, 17:30ean, Bilboko Arriaga antzokitik hasi eta San Mameseraino.
Ikusi gehiago
Gure Esku, Gu Ere Bai eta Gernika-Palestina plataformek antolatu dute agerraldia, baita larunbateko manifestazioa ere, Herri Libreak. Euskal Herria-Palestina. Genozidioa Stop lelopean. Ia berrehun palestinar bizi dira Euskal Herrian, eta gaur, San Mames pareko zabalgunean, horietako batek hitz egin du, Mohamed Farajallahk. Adierazi du larunbatekoa ez dela futbol partida soil bat, «oso egun garrantzitsua» baizik.
Azaldu du haientzat Palestinako futbol selekzioa Euskal Herrian jokatzen ikustea ikusgarritasunaren, duintasunaren eta esperantzaren berme bat dela: «Palestinako futbol selekzioak jokatzen duenean, ez du soilik futbolean jokatzen: existitzeko eskubidearen alde ari da borrokan». Balioa eman dio selekzioak Euskal Herrian jokatzeari: «Bi herriren arteko besarkada bat bezalakoa izango da, eta bi herri horiek badakite zer den existitzea, amestea eta haien identitatea bizirik mantentzea».
Agerraldian haur batzuk egon dira une oro kartelaren aurrean eserita, eta Farajallah haiei mintzatu zaie: «Guretzat oso garrantzitsua da haur hauek, Gazan urte bat eta erdi genozidio bat jasaten ondoren, haien selekzioa jokatzen ikusi ahal izatea eta alaitasuna sentitzea». Gogoan izan ditu «okupazio sionistak» eraildakoak, eta baita haien familiak ere.
Aireportuan harrera
Farajallahk jakinarazi du Palestinako futbol selekzioko jokalariak asteartean helduko direla Loiuko aireportura, 12:50ean, eta herritarrak animatu ditu harrera egitera joan daitezen aireportura.
Ikusi gehiago
