Irailean sartzearekin batera, hasi dira ETBko programen denboraldi berriak. Hurrengo astean hasiko dira gehienak, baina badago aurrea hartuko duen bat edo beste, Hitzetik Hortzera saioa tartean. Ohi bezala, programak bertsolaritza izango du hizpide atal guztietan, baina, aurten, Euskal Herriko Bertsolari Txapelketa izango du hizpide bereziki. Irailaren 19an hasiko da txapelketa, Hazparnen (Lapurdi), eta abenduaren 20an bukatu, Iruñean. Hortaz, igandero txapelketari eskainitako programa bat emango dute; guztira hamasei saio, lehiaketa amaitu arte. 15:00etan hasiko dira guztiak, ETB1en.
Igande honetan emango dute lehen atala, eta Udane Mugerza Salegi Bertsozale Elkarteko sustapen eragilea eta txapelketa antolatzeko taldeko kidea gonbidatu dute denboraldiari hasiera emateko. Mirari Martiarena Iraola aurkezlea izango du gidari, eta antolakuntzari buruz mintzatuko dira biak, parez pare. «Egin beharreko lanak, lanean ariko diren lagunak, bertsolariek egin beharreko lanak eta beste hainbat kontu aletuko dituzte», azaldu dute Bertsozale Elkarteko kideek euren webgunean.
Saio bakoitzean Euskal Herriko Bertsolari Txapelketako esparru bati behatuko diote: besteak beste, emanalditik emanaldira txapelketak hartzen duen norabideaz, ekitaldiaren antolaketaz eta egituraz, irudiaz eta eszenografiaz, eta epaileez hitz egingo dute. Horretarako, txapelketarekin lotura zuzena duen jendea elkarrizketatuko du Martiarenak astero, eta lehiaketaren historiako datuekin eta xehetasunekin ere jantziko du saioa.
Saioa bete bertso
Elkarrizketatu nagusiaz gain, mahaiaren bueltan bost gonbidatu bilduko dituzte astero Txikitik Handira atalean, eta txapelketaren inguruko bizipenez arituko dira kontu kontari, bai eta galdera labur batzuk erantzuten ere. Honako hauek mintzatuko dira: Alaitz Rekondo Ferrero gai jartzailea, Iñaki Aurrekoetxea Arkotxa epailea, Larraitz Trojaola Berezibar bertsozalea, Manex Agirre Arriolabengoa bertsolaria eta Marikarmen Albizu Etxabe Bertsularien Lagunak Elkarteko langile ohia. Hala, txapelketari «beste ikuspuntu bat» eman nahi izan diote.
Igande honetako atala bi bertso saiorekin osatuko dute. Batetik, Lakuntzako (Nafarroa) festetan egindakoa; Alaia Martin Etxebeste, Ekhiñe Zapiain Arlegi eta Eneko Lazkoz Martinez ibili ziren kantuan, eta Ibai Hernaiz Ormaetxea gai jartzaile. Bestetik, Hondarribian (Gipuzkoa) egindako bertso jaialdia emango dute. Maialen Lujanbio Zugasti, Miren Amuriza Plaza, Nerea Ibarzabal Salegi eta Xabat Illarregi Marzol aritu ziren bertsotan. Gaiak jartzen, berriz, Karlos Aizpurua Etxarte.
Euskal Herriko Bertsolari Txapelketa amaitu ostean, programak ohiko dinamikarekin jarraituko du, adierazi dutenez.
