2026. urteko Tene Mujika bekak ez du irabazlerik izango, Kristina Berasainek, Eneko Bidegainek eta Cira Crespok osatutako epaimahaiak hala erabakita. Zazpi proiektu aurkeztu dira deialdira, eta, epaimahaiaren arabera, «denak ziren, printzipioz, interesgarriak, baina denek zuten gabeziaren bat ere». Horrenbestez, eta «bekaren prestigioari eusteko», aurten beka ez ematea erabaki dute.
Debako Udalak eta Elkar argitaletxeak antolatzen dute Tene Mujika beka, eta haren helburua Euskal Herriko historia hurbila landuko duten lanak saritzea da. Bekari esker argitaratutako azkeneko lanak Jon Artanoren Juana, Alaitz Melgarren Josefa, neskame eta Mikel Sotoren Mirande, herriminez, ezin-minez izan dira. Azken hori joan den azaroan aurkeztu zuen Sotok berak, Donostian.
Iaz Iñaki Sagarnak eta Lander Aranberrik irabazi zuten saria. Euskal Herriak Israelekin izan duen jarreraren bilakaera aztertzea da haien asmoa, eta orain ari dira lana amaitzen. Ondo bidean, aurten argitaratuko du liburua Elkarrek.
