'Biga: Energia bola bat'
Ezohikoa da bilduma baten bederatzigarren zenbakiak lekua izatea ohar literario hauetan. Baina oraingoan merezi du.
Biga bilduma ezagutzen duen edonork badaki nola mantendu duen lehen zenbaki haren kalitatea hurrengo guztietan, huts egin gabe. Beharrik, formula bat ezarri zuten egileek, eta hari zintzo jarraituta plazaratu dituzte gainerakoak. Egitura finko bat sortu zuten, eta hari jarraitu diote zorrotz: bi orrialdeko luzera duten istorio buruaskiak, bosnaka antolatuak, bi orrialde hartzen dituzten tartekiez banatuta, amaieran sei atalez osatutako istorio jarraitu batekin, jolasez osatutako azken orri-biko bat duena. Harrigarria da aurkibideak erkatzea: liburuki guztietan hogeita bi atal daude, orrialde zenbaki berdinetan abiatzen direnak.
Baina bederatzigarrenak aldaketa batzuk ekarri ditu. Atalak hamabost dira, eta —hau benetan nabaritzen da— istorio jarraitua beste era batera emana dago. Oraingoan ez dago atalen etenik, goiburuetako markak gorabehera.
Akats bakarra dute abentura hauek: nahi baino lehenago amaitzen dira. Beharrik, haurren artean arrakasta itzela lortu du Bigak.
