Libano hegoaldea husteko agindu du Israelek

Qatarko Atzerri Ministerioko bozeramaileak prentsaurreko bat eman du goizean, eta horren arabera, Iran «lurralde osoari» egiten ari zaio eraso, ez soilik helburu militarrei. Horrez gain, esan du ez dagoela neholako komunikaziorik bi herrialdeen artean. Saudi Arabiak egin bezala, «ezinbestekoa» izanez gero bere burua «defendatzeko eskubidea» aldarrikatu du Qatarrek ere.

Erresuma Batuko lehen ministro Keir Starmerren inguruan hitz egin du gaur AEBetako presidente Donald Trumpek, The Sun egunkariari egindako adierazpenetan. Iranen aurkako erasoaldian Starmer izaten ari den jarreraren inguruan galdetuta, Trumpek esan du hura ez dela «asko laguntzen ari», eta gehitu du AEBen eta Erresuma Batuaren harremana jada ez dela «lehengo bera». Bada, Trumpek hitz horiek esan eta gutxira, Londres Zipren duen base militarrera gerraontzi bat bidaltzekoa dela esan du Times egunkariak, iturri ofizialak aipatuz. Frantzia ere dronen eta misilen aurkako sistemak eta fragata bat bidaltzekoa da Zipren duen base militarrera, Zipreko Gobernuko bozeramaileak jakinarazi duenez.

Iranek AEBek Kuwaiten duten base militarra bonbardatu zuen herenegun, eta Washingtonek gaur jakinarazi duenez, sei soldadu estatubatuar hil ziren eraso horretan. Oraingoz, horiek dira AEBetako armadak baieztatu dituen aurreneko heriotzak.

IAEA Energia Atomikoaren Nazioarteko Agentziak baieztatu du eraso egin diotela, gaur goizean, Irango Natanz zentral nuklearrari; halere, azpimarratu du eraikinak ez duela kalte larririk jasan. Uranioa aberasteko zentro bat da Natanzkoa, eta Irango programa nuklearreko gunerik garrantzitsuena da. Iazko ekaineko hamabi eguneko erasoaldian ere, AEBek eta Israelek bonbardatu egin zuten gune hori; eta, orduan bai, «kalte handiak» eragin. 

Iranen erasoei erantzuteko «eskubide osoa» duela ohartarazi du Saudi Arabiak, goizean zabaldutako komunikatu baten bidez. Hain justu, gaur goizean AEBek Riaden duten enbaxadari egin dio eraso Teheranek. Saudi Arabiaren arabera, eraso horrek «urratu» egiten du nazioarteko zuzenbidea, zeinak «immunitatea» aitortzen dien eraikin diplomatikoei, baita gerra garaian ere. Are, Saudi Arabiak adierazi du berak ez diela AEBei eta Israeli baimenik eman bere lurraldearen edo aire espazioaren bidez Irani eraso egiteko, eta Iranen jarrera gaitzetsi du.

OHCHR Giza Eskubideen Nazio Batuen goi mandatari Volker Tuerkek exijitu du ikerketa bat abiatu dezatela Iran hegoaldeko Minab herriko eskolaren aurkako bonbardaketaren nondik norakoak «xeheki» aztertzeko. Haren bulegoko bozeramaile Ravina Shamdasanik nabarmendu du azpiegitura zibilen kontrako erasoak gerra krimentzat jo daitezkeela. «Ehunka neskato hil ziren azken egunetako erasorik bortitzenean», gehitu du.

Irango Ilargi Gorriak emandako azken datuen arabera, larunbatetik hona 787 pertsonatik gora hil dira herrialdean, AEBen eta Israelen erasoen ondorioz. AEBetan egoitza duen HRANA Irango Giza Eskubideen Ekintzaileen sareak jakinarazi duenez, berriz, gutxienez 742 lagun hil dira; horietatik 176, haurrak. 

Irango presidentearen egoitza eta Irango Gobernuaren eraikin bat bonbardatu ditu Israelek; zehazki, Segurtasun Nazionalerako Batzorde Gorenarena. Bi eraikinak Teherango erdigunean daude. Horrez gain, «erregimenaren oinarrizko azpiegiturak eta entrenamendu militarrerako guneak» ere bonbardatu dituzte, Israelgo armadaren arabera.

Israelgo armadak Libano hegoaldeko dozenaka hiri ebakuatzeko agindu du; hain justu, tropa gehiago zabaldu dituen eremuetan eman du abisua. Halaber, Libanoko armadak jakinarazi du Libano hegoaldeko mugan dituen tropak eta postu militarrak hamar kilometrotara atzeratuko dituztela.

Libanoko armada erretiratu egin da hegoaldeko eremuetatik, Israelgo tropek aurrera egin ahala. Eskualde osora zabaldu dira erasoak, eta Israelek abagunea probestu du Libano hegoaldean, mugan, tropa gehiago zabaltzeko. Horixe jakinarazi du gaur Israelgo armadak, «defentsarako operazio bat» dela argudiatuta.