Aurtengo foru aurrekontuen negoziazioek berezitasun bat izan zuten: Elkarrekin Ahal Dugu koalizioak 2026ko aurrekontu proiektua onartzeko «ezinbesteko baldintza» gisa ezarri zuen Arabako zahar etxe pribatuetako lan ituna sinatzea, aspalditik piztuta zegoen lan gatazka itzaltzeko. Azkenean, abenduan sinatu zen lan itun hura, eta Elkarrekin-ek foru gobernuarekin adostu zuen hamar milioi euroren diru laguntzak ematea akordioan jasotako hobekuntzak ezartzen laguntzeko. Gaur plazaratu da diru laguntza horiek eskatzeko deialdia: sektoreko enpresek hogei eguneko epea izango dute eskariak egiteko.
Ikusi gehiago
Koalizio moreak biziki goraipatu zuen erdietsitako akordioa, eta gaurko laguntzen deialdiaren bitartez «sei urte baino gehiagoko utzikeria amaitu» izana ospatu du batzarkide David Rodriguezek. Deialdiak 2.010.000 euroren diru laguntzak biltzen ditu 2026. urterako, eta 4,2 miliona eurorenak, berriz, 2027. eta 2028. urteetarako. Sektorean, ordea, guztiak ez daude ados ELAk eta patronalak aurrekontu negoziazioen itzalean lorturiko akordioarekin: LAB sindikatuak, esaterako, uko egin zion akordioa sinatzeari, argudiatuta ez zituela langileen lan baldintzak «blindatzen», eta iragarri zuen zahar etxeetan mobilizatzen jarraituko zutela. Baliteke, hortaz, diru laguntza horiek sektoreko lan gatazkak guztiz ez baretzea.
