Egun nazionala dute gaur Katalunian, eta manifestazioetara deitu dute arratsalderako ANC Biltzar Nazional Katalana eta Omnium erakunde subiranistek, Hor nago. Hor gaude. Independentzia lelopean. Urtero bezala, 17:14an abiatuko dira; aurten, bi erakunde horiek Bartzelonan, Gironan eta Ampostan egingo dituzte manifestazioak.
Aurrez, eguerdian, instituzioek eta erakunde zibilek lore eskaintza egin dute Rafael Casanovaren omenezko oroitarrian, Bartzelonan. Horretan parte hartu ondoren hitz egin dute ANCko presidenteak, Josep Vilak, eta Omniumeko buruak, Xavier Antichek, eta «beste kolpe independentista bat» emateko eskatu diete herritarrei: Vilak esan du independentziaren aldeko «eskaintzarik hoberena» estelada hartu eta «indarrez bultzatzea» dela; Antichek, berriz, adierazi du «zapalkuntzaren karpeta» itxi behar dela, «autodeterminaziorako eskubidearen karpeta» bueltan irekitzeko, aintzat hartuta, gainera, Espainiako Auzitegi Konstituzionalak «aurki» ebatziko duela prozesu subiranistaren ondorioz erbesteratuta edo inhabilitatuta dauden politikarien geroaz —besteak beste, Carles Puigdemont Kataluniako Generalitateko presidente ohiaren eta Oriol Junqueras presidenteorde izandakoaren geroaz—. Irailaren 22an hasiko da kasua aztertzen, eta espero da udazkenean iritsiko dela sententzia.
