Iranen egoera ez dago baretzeko bidean. Asteartean bezala, gaur goizaldean ere AEBek Iranen instalazio militar bati eraso egin diote herrialdearen hegoaldean. Ordu batzuk geroago, Iranek jakinarazi du aire eraso bat egin duela AEBek eskualdean duten base militar baten kontra. Eta Kuwaitek adierazi du ondoren bere aireko defentsa sistemek droneak eta misilak erorarazi dituztela; ez du esan, ordea, non zehazki, ezta nork jaurti dituen ere. Kontuak kontu, Iran eta AEBak akordio bat zeharka negoziatzen ari diren honetan, eraso horiek are gehiago nahaspilatuko dituzte elkarrizketak.
AEBetako hedabideek Pentagonoko iturriak aipatuz kaleratu dutenez, aurrena lau drone erorarazi dituzte aireko defentsa sistemek, beren burua «babesteko»; horiek Ormuzko itsasartearen bueltan zebiltzan AEBetako ontzi batzuk zituzten helburu, iturri ofizialek adierazi dutenez. Horren ondoren egin diote eraso instalazio militar bati, Bandar Abbas kostaldeko hiriaren ekialdean.
Horren guztiaren harira, aintzat hartu behar da su eten bat ezarrita dagoela apirilaren 8tik Iranen —Israelek eta AEBek otsailaren 28an hasi zuten erasoaldia—. Astearteko erasoaren ondoren, ohartarazpen bat egin zion Teheranek Washingtoni: AEBetako tropek aurrerantzean ez zutela «aterpe segururik» edukiko Persiar golkoko herrialdeetan.
Eta gaur goizaldean AEBek egindako erasoaren ondoren, Iranen erantzuna heldu da. Horrela justifikatu du Irango Guardia Iraultzaileak, ohar batean: «Gaur goizaldean AEBek aireko jaurtigaiekin egindako erasoaren ondoren, eraso egin diogu AEBek erasoa egiteko baliatu duten baseari». Ez dute zehaztu base hori non dagoen. AEBek hogei base inguru ditu Persiar golkoan: Arabiar Emirerri Batuetan, Bahrainen, Iraken, Jordanian, Kuwaiten eta Qatarren, besteak beste.
Iranek, bide batez, AEBen erasoa salatu du. Atzerri Ministerioaren bozeramaile Eesmail Baqaeik nabarmendu du ohar batean Washingtonek nazioarteko zuzenbidea eta NBE Nazio Batuen Erakundearen Gutuna urratu dituztela. «Iranek beharrezko neurri guztiak hartuko ditu bere subiranotasuna defendatzeko, Nazio Batuen Erakundearen Gutunaren 51. artikuluari jarraituz».
