Batera edo bestera Groenlandiarekin «zeozer» egingo duela iragarri du Donald Trump Ameriketako Estatu Batuetako presidenteak, argudiatuta Artikoko uharte hori mendean izan nahi duela bere herrialdearen segurtasunerako; hau da, eskualde horren kontrola bermatzeko, eta Errusiak eta Txinak «okupa» ez dezaten. Agerian utzi izan du badaudela horretarako zenbait modu; tartean, Danimarkari erostea, uhartea herrialde horren parte denez gero. Bai Groenlandiak eta bai Danimarkak kontra egin diote proposamen horri, eta gaur bertan eztabaidatuko dute AEBekin, aurrez aurre, Etxe Zurian. Arratsaldean biltzekoak baitira JD Vance AEBetako presidenteordea, Marco Rubio Estatu idazkaria, Vivian Motzfeldt Groenlandiako Atzerri ministroa eta Lars Lokke Rasmussen Danimarkako haren homologoa, Euskal Herrian 16:30 direnean, hain zuzen. Washingtoni diplomaziaren bidez ahantzarazi nahi diote munduko irla handiena eskuratzeko burutazioa.
«Ez da geure autodeterminazio eskubidearekin jolasean ibiltzeko garaia. Beste herrialde bat gu geu kontrolatzeari buruz ari da hitz egiten», esan zuen atzo Jens-Frederik Nielsen Groenlandiako lehen ministroak, Sermitsiaq herrialdeko egunkariari eskainitako elkarrizketa batean. Groenlandia lurralde autonomoa da: 1979an, Danimarkak autonomia onartu zion —herritarrek erreferendumean berretsi zuten hori—; 2009an, berriz, estatusa berritu zuten, eta autodeterminaziorako eskubidea onartu zitzaion. Independentzia lortzeko modua litzateke herritarren gehiengoak horren alde egitea legezko erreferendum lotesle batean, baina, gauzak dauden moduan, lehen ministroak berretsi du Danimarka, NATO Ipar Atlantikoko Itunaren Erakundea eta EB Europako Batasuna «aukeratzen» dutela AEBen gainetik.
