CNI Espainiako zerbitzu sekretuek Auzitegi Gorenaren oniritziarekin zelatatu zituzten Carles Riera eta David Fernandez, 2019ko urrian Gorenak Kataluniako prozesu subiranistako buruen kontrako epaia kaleratu ondoren. Bartzelonako 32. Instrukzio Epaitegiaren eskaerari erantzunez, horren berri eman du gaur Espainiako Ministroen Kontseiluak, txosten batean.
Riera CUPeko diputatua zen orduan Kataluniako Parlamentuan (2016-2024); Fernandez jada ez zen alderdi independentista horretako diputatua (2012-2015), baina mugimendu independentistarekin lotuta jarraitzen zuen, batez ere Omnium Culturalen bidez.
Biek ala biek kereila bat aurkeztu zuten, susmoa zutelako CNIk zelatatu egin zituela Pegasus tresna zibernetikoa baliatuz. Kontuan hartu behar da 2022ko apirilean The Citizen Lab ikerketa zentroak azaleratu zuela Espainiako zerbitzu sekretuek hirurogei buruzagi independentista inguru espiatu zituztela Pegasus erabilita.
Bartzelonako 32. Instrukzioko Epaitegia auzi horren harira jarritako kereilak ikertzen ari da, eta Espainiako Ministroen Kontseiluaren txostenak dio bi ekintzaile independentista horien komunikazioak «oztopatu» zituela CNIk, komunikazio horiek «segurtasun nazionalaren kontrakoak» izan zitezkeelakoan. Fernandez 2019ko abendutik 2020ko ekainera zelatatu zuten, eta Riera, sasoi berean, bi urtez.
