AEBek Kharg uhartea bonbardatu dute bart, Iranen petrolio industriaren gune garrantzitsu bat. Donald Trump AEBetako presidenteak esan du «Ekialde Hurbilaren historian izan den bonbardaketa indartsuenetako bat» izan dela, eta jomuga guztiak «suntsitu» dituztela. Kharg uhartea Irango kostatik 25 kilometrora dago; han dago herrialdearen petrolio azpiegitura nagusienetako bat, eta petrolio ontziak kargatzeko gune nagusia da.
Ikusteko dago Iranek erantzungo duen. Trumpek iragarri zuenean Ormuzko itsasartea ireki ezean Khargi eraso egingo ziola, Teheranek ohartarazi zuen Ekialde Hurbilean AEBekin lotuta dauden petrolio, ekonomia eta energia azpiegitura guztiak birrinduko zituela. Efe albiste agentziaren arabera, Hamasek Irani eskatu dio auzo dituen herrialde arabiarrei ez erasotzeko, euren arteko «anaitasun harremanak babesteko».
Ikusi gehiago
Gaur dira bi aste Israelen eta AEBen Iranen aurkako erasoaldia hasi zenetik, eta gatazkak kinka gaiztoan jarri du nazioarteko geopolitika eta ekonomia. Bonbak egunero ari dira erortzen Iranen, eta Israelek Libanoren aurkako erasoaldia areagotu du. Ormuzko itsasartearen blokeoak ehun dolarretik gora igo du Brent upelaren prezioa, eta erregaiaren prezioa. Atzo Turkiako ontzi batek eta Indiako beste batek Ormuzko itsasartea igaro zuten, Iranen baimenarekin.
Petrolio upelaren prezio azken urteetan ez bezala igo da aste honetan, eta 103 dolarretik gora geratu zen atzo. AEBetako Energia Departamentuak iragarri du datorren aste amaieran bere petrolio erreserba estrategikotik upelak ateratzen hasiko dela, 86 milioi upel, prezioen gorakadari aurre egiteko.
