Israelgo auzitegi batek Saif Abu Kexek eta Thiago Avila Global Sumud Flotillako kideen atxilotzea luzatu du, bihar arte. «Torturatu, jipoitu eta bakartuta eduki» dituztela salatu dute aktibistek azken orduetan, eta Flotillak auzitegiaren erabakia gaitzetsi du. «Haien aurkako kargu formalik aurkeztu ez duten arren, Israelgo Fiskaltzak akusazio orokorrak egin ditu, motibazio politikoak tarteko; ekintza humanitarioa kriminalizatzeko saiakera bat izan da», adierazi du, ohar batean.
Atzo hartu zuen erabaki hori Israelgo Ashkelon hiriko auzitegi batek. Atxilotuak Shikmako kartzelara bidali dituzte berriro ere, eta bertan «bakartuta» izango dituztela jakinarazi dute. Flotillak atzo aditzera eman zuenez, bi atxilotuek gose greban jarraituko dute «legez kontra» atxilotu dituztelako, eta eman dizkieten tratu txarrak salatzeko. Gainera, Flotillak zehaztu du ekintzaileen abokatuek —Adalah Israelgo Gutxiengo Arabiarraren Eskubideen Zentro Legalekoak horiek— legez kanpokotzat jo dutela auzibidea, argudiatuta atxiloketa «nazioarteko uretan» gertatu zela, eta ez daukala euskarri legalik. «Israelek ez dauka eskumenik nazioarteko uretan atxilotzen diren atzerriko zibilen gainean», gogorarazi dute oharrean.
Horrekin lotuta, atxilotu dituzten bi aktibisten testigantzak aurkeztu zituen atzo defentsak. Bertan, Abu Kexekek eta Avilak gehiegikeria larriak salatu dituzte; besteak beste, jipoiak, denbora luzez immobilizatzea, bakartzea, eta begiak estaltzea. Defentsak adierazi duenez, aipatutako ekintza horiek torturatzeko moduak dira nazioarteko zuzenbidearen arabera.
Flotillak salatu du Israelgo auzitegiek «legez kontrako atxiloketak eta estatu biolentzia legitimatzeko» balio dutela, batez ere palestinarrak eta «haien aliatuak» tartean badaude —palestinarra da Abu Kexek, eta brasildarra Avila—. «Adituak kezkatuta daude, kasu horietan ez dagoelako berme prozesalik, eta lege sistema zuzenbidea urratzen duten politikak babesteko erabiltzen delako», adierazi du Flotillak oharrean.
Ere berean, Flotillak zehaztu du Abu Kexeken eta Avilaren kasua ez dela kasu «bakan» bat, baizik eta palestinarren bizitzen eta haiekin elkartasunean lan egiten duten guztien aurkako «eraso etengabe baten parte» dela.
Oharrean gogorarazi dute ezer gutxi egin duela munduak «palestinarren bizitzaren suntsipena gelditzeko», eta hainbat eta hainbat ekintzaile horregatik ari direla flotillan parte hartzen. Flotillak nazioartearen «premiazko ekintza» bat eskatu du gaur, eta adierazi du nazioarteko gobernuek erabaki bat hartu behar dutela: «Nazioarteko zuzenbidea errespetatu, edo haren suntsipenaren konplize izaten jarraitu».
Ongietorria Loiun
Israelgo armadak flotillaren aurkako operazio bat abiatu zuen iragan asteazkenean. 175 bat ekintzaile hartu zituzten gatibu, nazioarteko uretan zirela, Greziako Kreta uhartetik ehun bat kilometrora. Misioan hamabi euskal herritar zihoazen, eta Israelgo armadak haietako zazpi atzeman zituen.
Atzo iritsi ziren Euskal Herrira Global Sumud Flotillaren Euskal Herriko ordezkaritzako bi kide. Ongietorria egin zieten Loiuko aireportuan, eta mugimenduak eskerrak eman zizkien, «Gazako blokeoa hausteko eta laguntza humanitarioa eramateko izan duten parte hartzeagatik». Gasteizko irakasle Salim Malla ere Global Sumud Flotillako kidea da, eta gaur iritsi da Loiuko Aireportura. Kazetarien aurrean salatu ditu Israelgo armadaren eskuetatik jasandako gehiegikeriak: «Nahi izan zuten guztia egin zuten gurekin».
Mallak Espainiako Gobernua eta Eusko Jaurlaritza ere kritikatu ditu, haren esanetan ez baitute «ezer egin» Tel Avivek atzemandako herritarrak aberriratzeko. Zehaztu duenez, Turkiako Gobernuak soilik lagundu die: «Hegaldi bat jarri ziguten, eta azterketa medikua eta psikologikoa egin. Gainera, abokatuekin batera deklarazio bat egiten lagundu ziguten, Giza Eskubideak urratzeagatik Nazioarteko Zigor Auzitegian demanda bat aurkezteko».
Gaur arratsaldean beste hiru euskal aktibista dira iristekoak, eta haiei ere ongietorria egiteko deialdia egin du Flotillaren Euskal Herriko ordezkaritzak, 18:35ean, Loiuko aireportuan.
