Azken saiakeran ere ez du lortu Sebastien Lecornu Frantziako lehen ministroak herrialdeko krisi politikoari irtenbide bat aurkitzea. Herenegun dimisioa aurkeztuagatik ere, Emmanuel Macron presidenteak gaur arteko epea eman zion Asanblea Nazionaleko alderdiekin biltzeko, egoera egonkortuko lukeen gobernu talde bat eratzen ahalegindu zedin. Negoziazioak «ondo bidean» zeudela esan du goizean Matignon jauregiaren atarian egindako agerraldian, baina iluntzean, France 2 telebista katean emandako hitzaldian, aitortu du bukatutzat jotzen duela bere «misioa». Edonola ere, Macronen alde lerratu, eta esan du oraindik ere badirela «konponbide bat aurkitzeko aukerak»; haren arabera, alderdien gehiengoak ez du Asanblea Nazionala desegiterik nahi. Lecornuk Macroni galdegin dio bi egunen buruan izendatzeko beste lehen ministro bat, eta, AFP agentziak Eliseoko iturriak aipatuta argitaratu duenez, hala egingo du presidenteak.
Hain justu, goizean, Lecornuk aditzera eman du ados jartzeko aukerarik bazela. Matignon jauregiaren atarian, esan du badagoela «borondatea» urtea amaitzerako aurrekontuak onartzeko, eta ez duela uste hauteskundeak aurreratu beharko dituztenik: «Borondate horrek konbergentzia bat sortuko du, zeinak [legebiltzarra] desegitea urrunduko duen, nola ez». Arratsaldean Macronekin elkartu da Eliseoan, egunotako negoziazioen «ondorioak» aurkezteko, hau da, egungo egoeran gobernu bat osatzea posible zen edo ez esateko. Elkarrizketak elkarrizketa, berriro ere Frantziako presidentearen esku dago hurrengo pausoa zein izango den erabakitzea.
Oposizioa ez da baikorra. Lehen ministroarekin batzartu ostean, Oliver Faure PS Alderdi Sozialistako buruak kazetariei adierazi die egungo gobernuak ez diela bermerik ematen ziurtatzeko bertan behera utziko duela pentsioen erreforma. Hori da, gaur-gaurkoz, ezkerreko alderdien eskari nagusia. Eta, hain justu, dimisioaren berri eman ondoren, Lecornuk onartu du afera hori dela «blokeo puntu nagusietako bat».
2023an onartu zuten erreforma hori, Asanblea Nazionalaren onespenik gabe. Erretiroa hartzeko gutxieneko adina 62 urtetik 64ra atzeratu zuen erreforma hark, eta horren aplikazioa geraraztea da PSk gobernua babesteko jarritako baldintza nagusia. Faurek gaur esan duenez, Elisabeth Borne Hezkuntza ministroak baino ez du mahai gainean jarri erretiro atzerapena geldiarazteko aukera, «baina inork ez du bermerik eman». Hain zuzen, Borne zen lehen ministro erreforma hori onartu zutenean.
Sozialistekin mintzatu ostean, komunistekin eta ekologistekin bildu da lehen ministroa. Bilkuraren ostean, Faurek egindako eskaera bera egin du Fabien Roussel PCF Frantziako Alderdi Komunistako buruak: erreformaren aplikazioa eteteko exijitu du, eta esan du «behingoz» Asanblea Nazionalean bozkatu behar dela neurri horren inguruan.
Berdeak alderdiko buru Marine Tondelierrek, berriz, Macroni ohartarazi dio bere hurbileko beste lehen ministro bat hautatuz gero ez duela «minutu bat» ere iraungo. Horregatik, Tondelierrek uste du «inoiz baino hurbilago» dutela lehen ministro ezkertiar eta ekologista bat edukitzea.
Manuel Bompard LFI Frantzia Intsumisoko koordinatzaileak, berriz, adierazi du «zentsuratu» egingo dutela Macronen politikekin jarraitzeko asmoa duen gobernu oro. LFIko parlamentari Mathilde Panot ere mintzatu da kazetarien aurrean, eta argitu du PSk eta Bornek aipatzen duten pentsio erreformaren «etenaldiak» ez duela esan nahi erreforma bertan behera utziko dutenik, baizik eta erretiroa hartzeko adina 63 urtera igaroko dela. Gehitu du LFIk erreforma «indargabetzea» galdegiten duela.
Eskuin muturra ere ez dago bide beretik jarraitzeko prest: «Gobernu honek egiten duen guztia atzera botako dut», adierazi die kazetariei gaur Marine Le Pen RN Batasun Nazionalaren talde parlamentarioko presidenteak. Eta gehitu du: «Txantxa hau gehiegi luzatzen ari da. Gobernuak inozotzat hartzen ditu frantziarrak». Horregatik, hauteskundeetara deitzeko exijitu dio Macroni.
Laugarren dimisioa
Hilabete ere ez da igaro Lecornuk kargua hartu zuenetik, eta gobernu berria izendatu biharamunean iragarri zuen dimisioa, argudiatuz ez zegoela baldintzarik lehen ministro gisa zituen eginbeharrak bete ahal izateko. Azken hilabete eskasean, oposizioko alderdiekin elkartzen aritu da 2026rako aurrekontuak adoste aldera, arrakastarik gabe. Aurrekontuena kontu labainkorra da Frantzian. 2025erako aurrekontuak dekretuz onartu zituzten, eta datorren urterakoetan 43.800 milioi euroren murrizketak iragarri zituen François Bayrouk —Lecornuren aurreko lehen ministroak—, eta oposizioak ez zuen begi onez ikusi: Bayrouk bere aldeko konfiantza mozio bat aurkeztu zuen, eta oposizioak bat egin zuen haren kontra.
Macronek gutxiengoa du Asanblea Nazionalean, baina Eliseoko iturriek diotenez, «datozen 48 orduetan» izendatuko du beste lehen ministro bat —iazko uztailean legebiltzarrerako bozak egin zituztenetik izendatutako bosgarrena litzateke—; ez dirudi, hortaz, Asanblea Nazionala desegin eta bozetara deitzeko asmoa duenik.
