Frantziako hainbat hiri handitan protestak zeuden deituta gaur, eta milaka lagunek hartu dituzte kaleak bizitzaren garestitzea salatzeko. Protesta baketsuak egin dituzte hainbat lekutan, eta istiluak ere izan dira beste hainbatetan. Frantziako Gobernuak goizean goizetik ohartarazi du «ezker muturreko» taldeek kalteak eragiteko «arrisku handia» zeukatela gaur, Frantziako hainbat hiritan. Iturri ofizialen arabera, eguerdirako 140 protesta zenbatu dituzte Frantzia osoan, eta 30.000 lagundik gora zenbatu dituzte protesta horietan. Laurent Nuñez Lehen ministroaren arabera, 270 lagundik gora atxilotu dituzte. Jean-Luc Melenchon LFI Frantzia Intsumisoa alderdiko buruak, aldiz, adierazi du herritarrak «modu baketsuan» mobilizatu direla.
Protesta handienak Frantziako hiri handietan izan dira. Hala nola, Parisen, Marseillan, Rennesen, Okzitaniako Tolosan, Lillen, Lyonen eta Angersen. Barne Ministerioaren arabera, «lapurreta saiakerak eta estatu indarren aurkako erasoak» izan dira Frantziako hainbat txokotan. Gainera, salatu dute manifestariek su eman dietela hiri altzari askori, eta hainbat erakunderen eta komunikabideren aurkako ekintzak egin dituztela.
Melenchonek, berriz, X sare sozialean salatu du hedabideek protestak tratatzeko duten modua. «Albistegietan biolentziaz betetako irudiak ipintzen dituzten bitartean, jendea modu baketsuan mobilizatzen ari da hemen. Bi mundu, bi errealitate». Bide beretik jo du haren alderdikide eta Sain Deniseko alkate Bally Bagayokok. France Info irratiari elkarrizketa batean esan dioenez, mobilizazioen helburua zera da: «Borroken, suminduen eta belaunaldien bateratzea». Era berean, konbentzituta esan du gaurko mobilizazioak «dinamika garrantzitsuago baten abiapuntua» direla.
Haiei erantzunez, Marine Le Pen Frantziako eskuin muturraren liderrak adierazi du aldarrikapen sozialak egiteko mobilizatzea «bidezkoa» zela, baina salatu du «ezker muturreko bazter nahasle batzuek aldarrikapen horiek «hondatu» dituztela. Gaineratu du Melenchonen eta haren alderdikideen diskurtsoek «biolentzia legitimatzen» dutela: «Ordena zapalkuntzatzat daukate, eta desordena eskubidetzat. Herrialdea kaosean amildu dadila besterik ez dute nahi».
Iskanbila manifestarien eta Poliziaren artean
Marseillan, esaterako, udaletxean sartu dira manifestariak sarrerako atea puskatu ostean. Estatu indarrek berehala desalojatu dituzte, baina hainbat kalte eragin dituztela adierazi du Benoit Payan alkateak. Era berean, jakinarazi du Polizia gehiago bidaltzeko eskatu diola Emmannuel Macron presidenteari, eta honek baietz erantzun diola. «Onartezina da horrelako aldarrikapenak erabiltzea nazio gisa batzen gaituen eremua suntsitzeko», salatu du, eta, gaineratu, manifestariak eskuin muturraren «inozo erabilgarriak» direla, segurtasun ezari buruzko mezua indartzen dutelakoan. Gainera, hainbat dendak «kalteak» jasan dituzte, baita polizia etxe batek ere. Hori adierazi dute bertako agintariek.
Charge de la police avec matraques et gaz lacrymogène dans le secteur Opéra à Paris pour mettre fin à un cortège de plusieurs centaines de personnes. #17octobre #Paris https://t.co/ARckFW9Mlv
— Luc Auffret (@LucAuffret) October 17, 2026
Parisen, berriz, Poliziak hamarka lagun atxilotu ditu galarazita dauden objektuak gainean eramateagatik, eta hainbat kontzentrazio sakabanatu ditu gas negar eragilea erabilita. Milaka lagun kalean daude oraindik, eta errepideak blokeatzen ari dira.
Frantziako Gobernuak jakinarazi duenez, 10.000 Polizia eta Jendarme inguru hedatu ditu Frantzia osoan, horietatik 5.000 inguru Paris hiriburuan.
