Putin eta Xi aliatuek nazioarteko «ordena multipolarra» babestu dute

Errusiako eta Txinako presidenteek bilera egin dute gaur, eta Indo-Pazifikoko ekonomiaren susperraldia goretsi: Putinek Errusiaren kontrako zigorrak gutxietsi ditu, eta Xik nabarmendu du eskualdean «bakea» eta «segurtasuna» beharrezkoak direla.

Vladimir Putin Errusiako presidentea eta Xi Jinping Txinakoa, gaur, Shenzhenen. SERGEI BOBYLEV / EFE
Vladimir Putin Errusiako presidentea eta Xi Jinping Txinakoa, gaur, Shenzhenen. SERGEI BOBYLEV / EFE
Julen Otaegi Leonet.
2026ko azaroaren 18a
10:05
Entzun 00:00:00 00:00:00

Ameriketako Estatu Batuetako, Errusiako eta Txinako presidenteek bihar bertan egingo dute elkarren arteko estreinako hiruko bilera, Asia ekialdeko herrialde horretako teknologia konpainia handienek beren egoitzak dituzten hirian, Shenzhenen. APEC Asia eta Ozeano Bareko Ekonomia Elkarlanak han ekin dio gaur urtero antolatu duen foroari, eta Moskuk eta Pekinek bilera bat egin dute dagoeneko: Vladimir Putin Errusiako presidenteak esan du bi herrialdeek «ikuspuntu eraikitzailea» dutela nazioartean «ordena multipolarra» ezartzeko, «klima geopolitikoa zaila» bada ere; Xi Jinping Txinako presidenteak, berriz, adierazi du, «zorigaitzak zorigaitz», bien arteko harremana «arroka bezain egonkorra eta fidagarria» dela oraindik ere, aliatu geoestrategikoak direnez gero.

Ikusi beharko da biharko hiruko bilerak itunik egiteko balioko ote duen, edo, bestela, hiru potentziek elkarrengana hurbiltzeko baliatuko duten. Putinek irizten dio onura potentzialak ekarriko dituela: «Elkarrekin eser gaitezke iritziak trukatzeko, herrialdeon arteko edozein desadostasun politiko edo ekonomiko konpontzeko, baita segurtasunari dagozkionak ere, konpromisoak bilatuz, interesak orekatuz eta mundu osoan garapen jasangarriaren oinarriak elkarrekin sendotzeko lan eginez».

Foroan emandako diskurtso batean, Xik adierazi du «bakea eta egonkortasuna babestu» behar direla Indo-Pazifikoan, iritzita ezin dela egon oparoaldirik «aurrez segurtasuna» bermatu gabe: «Kanpoko baldintzak geroz eta konplexuagoak izan, orduan eta garrantzitsuagoa da guretzat gerraosteko nazioarteko ordenari eustea». Hedabideek-eta jaso dutenez, protekzionismoaren kontra egin du, eta «irekieraren edo isolamenduaren» artean hautatzeko esan die APECeko foroan parte hartzen ari diren enpresariei.

Biharko hiruko bileraren agendan dago, besteak beste, buru nuklearrak mugatzeko hitzarmena, joan den otsailetik iraungita baitago START Berria ituna, arma nuklearren kopurua gutxitzeko eta ikuskatzeko Errusiak eta AEBek 2010ean sinatutakoa. Washingtonek nahi du Pekinek ere konpromisoak hartzea buru nuklearrei dagokienez, bere proiekzioen arabera, Asiako herrialdeak mila izango ditu-eta hamarkada amaitzerako —Errusiak 4.400 dauzka, eta AEBek 3.700 dituzte, SIPRI Bakearen Nazioarteko Ikerketa Zentroaren arabera—.

Putinek Ukrainako inbasioaz eztabaidatzeko baliatu nahi du biharko bilkura, eta Donald Trump AEBetako presidenteak atzo esan zuen «eztabaidagai faboritoa» duela hori; Xik, ordea, ez du uste hiru aldeko bilera 2022an Errusiak ekin zion inbasioari eztabaidatzeko leku aproposa denik. Irango gerraz ere hitz egitekoak dira. Horixe nahi du Trumpek behintzat, Mosku eta Pekin, Teheranen aliatu formalak ez izanagatik ere, harreman estrategikoa baitute Ekialde Hurbileko herrialde horrekin.

Harrera Trumpi

AEBetako presidentea goizean heldu da Txinara, ASEAN Asia Hego-ekialdeko Nazioen Erkidegoak bi urtean behin egin ohi duen goi bileran egon eta gero Air Force One hegazkin presidentziala hartuta; Manilatik abiatu da, eta ziurtatu du, bide batez, «inoizko akordio komertzialik handiena» itxi duela Filipinekin.

Xik egin dio ongietorria Trumpi, eta hori ez da ohikoa, bestelako goi kargudunek egiten baitituzte harrerak; AEBetako presidentea maiatzean Pekinera joan zenean, esate baterako, Txinakoak ez zion aireportuan itxaron. Irailean, Xi Washingtonera joan zenean bisita ofizial bat egitera, Trumpek egin zion harrera hari; lehenbiziko aldia izan zen atzerriko agintari bati halakorik egiten ziola. Bada, gaur, Txinako presidenteak keinu bera egin dio AEBetakoari.

Putinen arabera, errusiaren kontrako zigorrek porrot egin dute

Kremlineko buruak nabarmendu du «aldaketa tektoniko» bat egon dela, eta orain Asiako eta Ozeano Bareko herrialdeak direla munduko ekonomiaren erdigune; Ukrainako inbasioa aipatzeko ere baliatu du foroan eman duen hitzaldi bat. «Egia da, zigorrek eta muga zergek garapenari eragin dakizkioke, baina ez dira kapaz ekonomien hazkundea erabat gerarazteko edo horiek suntsitzeko», esan du, hainbat agentziak eta hedabidek jaso dutenez.

Gatazka hori ez du hitzez aipatu, baina esan du Mendebaldeak Errusiari ezarritako zigor ekonomikoek porrot egin dutela, eta herrialdea «desegonkortzeko» eta «izutzeko» gaitasuna galdu dutela dagoeneko: «Batera edo bestera, geografiari, gure izaera nazionalari eta munduko ekonomian eta politikan dugun rolari esker, duinki gailendu gara froga horietan guztietan». Erantsi du Mendebaldeko herrialdeak jada ez direla «hegemonikoak», eta horiek «gainbehera umiliagarrian» daudela Errusiaren kontrako zigorrak ezarriagatik.

Bestalde, Ukrainaren eraso batek kalteak eragin zituen atzo Krimeako zubian, droneak baliatuta; Kremlinek 2014an gauzatutako anexioaren sinboloetako bat da. Bada, gaur, Moskuk esan du zubi hori agudo berreraikitzeko teknologia eta esperientzia dituela. Horixe esan du gaur Andrei Nikitin Errusiako lehen ministrordeak, Tass albiste agentziak jaso duenez. Nikitinek erantsi du trafikoa berbideratzeko bide alternatiboak ezarriko dituztela bien bitartean.

Kazetaritza etikoaren arabera sortua

Nola bermatzen dugun edukien kalitatea

Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Zure babes ekonomikoari esker egiten dugu kazetaritza konprometitua. BABESTU BERRIA