Israelek gaur ireki du Gazaren eta Egiptoren arteko igarobidea. Atzo ziren hura irekitzekoak, baina irekiera egun bat atzeratuko zutela jakinarazi zuen atzo Israelgo Defentsa Ministerioko Cogat erakundeak. Israelgo segurtasun arduradun batek gaur iragarri du EB Europako Batasuneko ikuskatze taldea iritsi dela jada Rafahra, eta igarobidea irekita dagoela bi noranzkoetan, herritarrak bertatik igarotzeko. Rafahko pasabidea 2024ko maiatzetik izan dute itxia Israelgo indarrek.
Hala ere, sartu-irtenak «mugatuak» izango dira. Oraingoz, esan dute goizean palestinar talde bat sartu dela Gaza hegoaldeko pasabidetik, 50 lagun, autobus batean. Eta adierazi dute ez dela bertatik lagunik atera: «Oraingoz, inor ezin izan da irten, baina Osasunaren Mundu Erakundeak jakinarazi digu bost pertsona irtengo direla gaur», azaldu du Zaher al-Waheidi Gazako Osasun Ministerioko arduradunak.
Anbulantziak zain daude igarobidearen Egiptoko aldean, Gazako pazienteak artatzeko prest. Mohammed Abu Salmiya Gaza iparraldeko Al-Xifa ospitalearen zuzendariak Al-Jazeera hedabideari adierazi dio 450 paziente daudela zerrendan «egoera kritikoan», eta azaldu du horietatik bost soilik irten ahal izango direla gaur Rafahko pasabidetik: «Mekanismo argiak nahi ditugu larri dauden zaurituak Gazatik atera ahal izateko». Israelgo Gobernuaren arabera, egunean 100-150 lagun inguru pasatuko ahalko dira joan-etorrian.
Palestinako iturri ofizialen arabera, 100.000 palestinar inguruk egin dute alde Gazatik 2023ko urriaren 7tik geroztik, eta, osasun iturrien arabera, gutxienez 1.268 pertsona hil dira Gazan Israelek Rafahko pasabidea itxi zuenetik, ezin izan delako laguntza humanitarioa sartu.
