Milaka eta milaka lagun elkartu dira Hegoaldeko lau hiriburuetan Palestinaren aldeko mobilizazioetan
Sindikatuek Palestinaren aldeko lanuztera deitu dute urriaren 15ean Hego Euskal Herrian. Zuzenean ari dira horren berri ematen BERRIAko kazetariak: Olatz Silva Rodrigo, Gotzon Hermosilla, Ion Orzaiz, Joxerra Senar, Iñaut Matauko Rada, Kristina Martin, Maddi Iturriotz Alkorta eta Edurne Begiristain.
-
LABen arabera, 110.000 pertsonak baino gehiagok parte hartu dute eguerdian Hego Euskal Herriko hiriburuetan egindako manifestazioetan. ELAk patronalen, gobernuen eta alderdi politiko arduradunen egoitzak aukeratu ditu mobilizazioak egiteko.
-
Industriako enpresa handienetan, baita txikiagoetan ere, elkarretaratze ugari egin dituzte: CAF, Volkswagen, Mercedes, Fagor, Irizar eta Arcelor enpresetan, besteak beste.
-
Arratsaldean mobilizazio gehiago izango dira: Palestinarekin Elkartasunak manifestazioak egingo ditu Hegoaldeko lau hiriburuetan, eta Gernika Palestinak kazeroladak Bilbon, Donostian, Gasteizen eta herrietan.
-
Elkartasuna esperantza da, Amagoia Mujika Tolaretxipiren analisia.
Eusko Jaurlaritzako Osasun Sailaren arabera, Osakidetzan goizeko txandako langileen %5,27k bat egin dute grebarekin. Araban %4,8k, Bizkaian %4,92k eta Gipuzkoan % 6,18k. Kategoria profesionalen arabera, intzidentzia %3,23koa izan da medikuen artean, % 5,08koa erizainen artean, eta %7,66koa gainerako langileen artean. Gaueko txandan, jarraipena % 0,05ekoa izan da, Osakidetzaren arabera.
Langile ugarik bat ere egin dute bat Palestinaren aldeko lanuztearekin. Hego Euskal Herriko industriako enpresa handienetan, baita txikiagoetan ere, elkarretaratze ugari egin dituzte: CAF, Volkswagen, Mercedes, Fagor, Irizar eta Arcelor enpresetan, besteak beste. Kristina Martin BERRIAko kazetariak eman du horren berri.
Hezkuntzan egun osorako deitu dute greba, eta jarraipena handia izan dela esan dute sindikatuek: %60koa sare publikoan eta %80koa ikastoletan. Gazte andana elkartu da Ikasle Abertzaleen eta Ikamaren zutabeetan.
LAB sindikatuak emandako datuen arabera, 110.000 baino gehiago izan dira eguerdiko mobilizazioetan parte hartu dutenak. Gasteizen, esaterako, leporaino bete da Andre Mari Zuriaren plaza.
Goizeko mobilizazioak, orohar, baketsuak izan dira. Iruñean soilik izan dira istilu batzuk: gazte batzuk Burger King seinalatzen ari zirela, manifestarien aurka oldartu da Espainiako Polizia.
Amaitu dira goizeko manifestazioak, baina arratsaldean segituko dute Palestinaren aldeko mobilizazioek.
Palestinarekin Elkartasunak manifestazio bana deitu du Hego Euskal Herriko hiriburuetan: Gasteizkoa 17:30ean abiatuko da Katedral Berritik; Iruñekoa 18:00etan PSNren egoitzaren paretik; Donostiakoa ere 18:00etan Pio XII plazatik; eta Bilbokoa 18:30ean Hezkuntza Delegaritzaren paretik.
Gernika Palestinak, berriz, kazeroladak deitu ditu herrietan eta Bilbon, Donostian eta Gasteizen, 19:30ean.
Greba egunak oraingoz utzitako gertakari nagusiak bildu ditu Aitor Biain BERRIAko kazetariak: Milaka lagunek lantokietatik kalera eraman dute Palestinaren aldeko protesta.
Nafarroako foru administrazioko langileen %8,22k (1.310 pertsonak) bat egin dute grebarekin, Nafarroako Gobernuko Funtzio Publikoko Zuzendaritza Nagusiak emandako behin-behineko datuen arabera. Datu horietan ez daude Osasunbidea Nafarroako Osasun Zerbitzukoak; aurrerago emango dituzte.
LABen arabera, 110.000 pertsonak baino gehiagok parte hartu dute eguerdian Hego Euskal Herriko hiriburuetan egindako manifestazioetan.
Eguerdiko manifestazioetan milaka eta milaka lagun elkartu dira Hego Euskal Herriko lau hiriburuetan. Irudian, Donostiako eta Bilboko protestak, hurrenez hurren.
ELA sindikatuak 67.194 zenbakia nabarmendu du bere mobilizazioetan. Hori da igandera bitarte Israelen azken oldarraldian Gazan hildako palestinarren kopuru ofiziala.
Goizeko 11:00ak heldu direnean, Lasarte-Oriako (Gipuzkoa) Michelin lantegitik langileak ateratzen hasi dira, sindikatuek deitua zuten lanuztearekin bat egiteko. Lantegiaren atarian elkartu dira horietako asko, eta Langileok Palestinarekin! Palestinar herriaren kontrako genozidioa amaitu! zioen pankarta batekin egin dute protesta.
Garbiñe Aranburu LABeko koordinatzaile orokorrak adierazi du «elkartasun internazionalista ariketa erraldoia» izaten ari dela gaurkoa: «Euskal langileok berriro argi utzi dugu palestinar herriarekin gaudela».
🇵🇸 Garbiñe Aranburu LABeko koordinatzaile orokorrak adierazi du “elkartasun internazionalista ariketa erraldoia” izaten ari dela gaurkoa: “Euskal langileok berriro argi utzi dugu palestinar herriarekin gaudela”#U15LangileokPalestinarekin#15OWorkersForPalestine pic.twitter.com/hNqGpzcuCZ
— LAB SINDIKATUA (@LABsindikatua) October 15, 2025
Gasteizko Andre Maria Zuriaren plaza lepo manifestazio amaieran. Palestinako komunitateari eman diote hitza eta Internazionala abestuz amaitu dute.
Cordovillako suhiltzaile parkeak ateak parez pare irekirik ditu biribilgune handiaren alboko egoitzan. Ibilgailuak geldi daude eta giroa bare dago, gutxieneko zerbitzuekin baina lanuztea egiten ari diren seinale.
Iruñeko manifestazioa jendetsua izaten ari da. Handik lau kilometro hegoaldera, Morea merkataritza gunean eta Leclerc hipermerkatuan bizkarra erakutsi diote lanuzteari. Aparkalekuak nahiko beteta daude eta barruan negozioak irekirik.
