Albistea entzun

Ikastetxe guztiek modu orekatuan hartu beharko dituzte ikasle zaurgarriak

Jaurlaritzak jendaurrean jarri du ikastetxeen sarea planifikatzeko dekretu proiektua, eta aipatzen du ikasle zaurgarrientzat lekuak gorde beharko direla
Ikasle batzuk Andoaingo Aita Larramendi ikastolan, artxiboko irudian.
Ikasle batzuk Andoaingo Aita Larramendi ikastolan, artxiboko irudian. A.C. / FOKU Tamaina handiagoan ikusi

Irati Urdalleta Lete -

2022ko abuztuak 25

Segregazioa da egun hezkuntza sisteman dagoen arazo nagusietako bat; hau da, ikasle zaurgarrienak eskola batzuek hartzen dituzte batez ere, eta beste batzuetan ez dago ia halakorik. Eusko Jaurlaritzak hori aldatzea jarri du xede gisa, jendaurrean jarri duen unibertsitatez kanpoko ikastetxeen sarea antolatzeko eta planifikatzeko irizpideak ezartzen dituen dekretu proiektuaren bidez. Oraindik behin-behinekoa izanda ere, joera bat markatzen du: ikasle zaurgarriak ikastetxe guztiek modu orekatuan jaso beharko dituztela dio.

Adierazpen orokorretatik neurri zehatzetara jota, proiektuak aipatzen du ikastetxe orok ikaspostuak gorde beharko dituela ikasle zaurgarrientzat: «Ikaspostuen eskaintza programatzeko orduan, dauden plaza guztiak hartu beharko dira kontuan, gizarte eta hezkuntza egoera ahulean dauden ikasleentzat gordetakoak barnean direla. Horrela, gizarte eta hezkuntza egoera ahulean edo egoera sozioekonomiko ahulean dauden ikasleen presentzia orekatua bermatuko da eragin eremuan funts publikoekin babestutako ikastetxe guztietan».

Segregazioarekin batera, ikastetxe publikoek eta itunpekoek eduki beharreko pisua da beste eztabaidagaietako bat. Dekretu proiektuan ziurtatu dutenez, bermatuko dute «eragin eremu guztietan» ikastetxe publiko bat behintzat egongo dela.

Dekretu proiektuak aipatzen du nola jokatuko duten ikastetxe bateko eskaria eskaintza baino handiagoa denean ere: «Eragin eremu edo zona horretako beste ikastetxe batzuetan plaza libreak badaude, hezkuntza arloko eskumena duen sailak ikastetxe horietara bideratu ahal izango ditu sobera dauden ikasleak, onarpen prozesua arautzen duen eta indarrean dagoen araudiaren arabera baremazioa egin ondoren».

Eta zer gertatuko da ikasturtea hasita dagoela iristen diren ikasleekin? Haien eskolatzea ere arautu asmo du dekretuak, eta jasotzen du eskola orok «erantzukide» izan beharko duela: «Hezkuntza arloko eskumena duen sailak, eskolatze batzordeen bidez, ahaleginak egingo ditu eta neurriak hartuko ditu, hain justu ere, bermatzeko funts publikoekin babestutako ikastetxe guztiak erantzukide direla onarpen prozesutik kanpo hezkuntza sisteman sartzen diren ikasleen eskolatze orekatuan».

Gainera, azaldu dute ikasturte osoan eskola batzuetan gizarte eta hezkuntza egoera ahulean dauden ikasleen proportzioa ez dela inguruko ikastetxeetan baino gehiago igoko. Finean, ikasle horien eskolatzea ere modu orekatuan egitea dute xede: «Eskolatze hori modu orekatuan egingo da, hezkuntzako lurralde ordezkaritzek zehazten dituzten ikastetxe publikoetan nahiz itunpeko ikastetxe pribatuetan, ikasle horien aita, ama edo legezko tutoreei entzun ondoren, onarpen prozesua erregulatzeko indarrean dauden arauek xedatutakoaren arabera».

Hezkuntzak datozen urteetan izango duen erronka —edo arazo— nagusietako bat izango da geroz eta jaiotza tasa apalagoa. Hori horrela, Eusko Jaurlaritzak gehienezko ratioak —gela batean egon daitekeen ume kopuru handiena— eta gutxieneko ratioak —gela bat osatzeko behar den gutxieneko ikasle kopurua— jaistea erabaki du. Itunpeko ikastetxeetan gutxieneko ratioak jaitsiko dituzte; ikastetxe publikoetan, berriz, gehienezko ratioak apalagoak izango dira maila batzuetan.

EP-IUren kritikak

Oraingoa ez da dekretuaren lehen bertsioa. Maiatzaren amaieran, dekretuaren beste zirriborro bat egin zen publiko. Batez ere, Elkarrekin Podemos-IUk kritikatu zuen —EH Bildu ere ez zegoen erabat konforme—, honako hau jasotzen zuelako zirriborroak: «Bermatuko da ikasle guztiek ikaspostu bat izango dutela diru publikoarekin». Koalizioaren irudiko, ikaspostu horiek publikoak izan behar zuten. Oraingoan, hauxe dago jasota: «Bermatuko da ikasle guztiek ikaspostu bana izango dutela bizilekutik gertu, derrigorrezko hezkuntza etapa guztietan». Gainera, aurrekoan ez bezala, oraingoan aipatzen dute «eragin eremu guztietan» ikastetxe publiko bat dagoela bermatu beharko dutela. Eztabaidaren ostean, EAJk esana zuen zirriborroa aldatzeko asmoa zutela.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

MHLI taldeko ikertzaileak eta Maria Jose Telleria Gipuzkoako Foru Aldundiko Kultura diputatua, gaur, aldundian. ©JON URBE / FOKU

Euskal liburu asko zentsuratu zituzten Franco hil ostean ere

Mikel Elkoroberezibar Beloki

Torrealdairen lanari «jarraipena» emanez, MHLI taldeak 1975. eta 1983. urteen arteko zentsurari buruzko liburu bat ondu du. Zentsoreen obsesioa «separatismoa» zela nabarmendu du Ana Gandara ikertzaileak.

Urkullu, gaur goizean, Eusko Legebiltzarrean. ©Endika Portillo / Foku

Urkulluk uste du euskararen aurkako epaiek ez dutela zalantzan jartzen hizkuntz politika

Iosu Alberdi

Urteko lehen kontrol saioa egiten ari dira Eusko Legebiltzarrean. Osasun sistema publikoaren eta pribatuaren arteko harremana babestu du lehendakariak.

AHTaren tunel bat Lezetxiki barruan egin dutela salatu dute ©Lezetxikiren Lagunak

Gipuzkoako Foru Aldundiak dio AHTak ez duela «inolako kalterik eragin» Lezetxikin

Isabel Jaurena

Ekologistak Martxan taldeak erran du AHTaren obrek «haitzuloko lurpeko ekosistema hauskorrari» kalte egin diotela.

«PSNrentzat noiz da eremuz aldatzeko garai egokia? Inoiz ere ez»

«PSNrentzat noiz da eremuz aldatzeko garai egokia? Inoiz ere ez»

Joxerra Senar

Ustekaberik ez zen izan atzo Nafarroako Parlamentuan, baina Mañerun «amorruz eta etsipenez» hartu dute albistea, euren nahiari jaramonik ez dietelako egin Navarra Sumak eta PSNk. Alkateak salatu du «bigarren mailako herritar» sentitzen direla.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...