ERREZETA
Eskalivada antxoekin
OSAGAIAK
4 LAGUNENTZAT
Lau tipulin.
Bi alberjinia.
Hiru tomate.
Baratxuri buru bat.
Kantauriko antxoa lata bat.
Baguette erako ogia.
Gatza.
Oliba olioa.
Oliba beltz birrindua.
1. Lehenik, barazkiak prestatzen hasiko gara. Labea berotzen jarri, 200 gradutan. Laberako erretilu zabal batean ipini alberjiniak, osorik. Sardexka batekin zulotxo batzuk egin azalean, beroaren ondorioz ez dezaten eztandarik egin. Ondoren, zabaldu erretiluan baratxuri buru osoa, tipulinak ere osorik eta tomateak txortenik gabe. Oliba olio txorrotada txiki bat gainetik bota, eta labean sartu. Ordu erdiz eduki labean. Ondoren, labea itzali, eta han utzi beste ordu erdi batez.
2. Labetik ateratzean, baratxuria erabat biguna egongo da, eta bota barruko mamia ontzi batera. Jarraian, tipulin erreak labanarekin moztu juliana erara —erraz moztuko ditugu: oso bigunak egongo dira—. Tomatea ere sardexka baten laguntzaz birrindu, eta ontzira gehitu. Azkenik, alberjinia erditik moztu, eta koilara baten laguntzaz mami guztia atera, eta ontzira gehitu hura ere. Gatz pitin bat gehitu, eta oliba olio txorrotada bat. Sardexka baten laguntzaz, ongi nahastu guztia hiru edo lau bat minutuz. Horrela lortuko dugu Kataluniako eskalivada famatua. Barazki sorta horrekin plater asko egin daitezke; oraingoan, ordea, pintxo moduko mokaduak prestatzeko erabiliko ditugu.
3. Baguette motako ogia xafletan moztu, eta txigortu. Ondoren, koilarakada bat eskalivada zabaldu xafla bakoitzaren gainean, eta jarri antxoa xerra bat gainean, txukun-txukun. Oraingoan kontserbako antxoa erabiliko dugu, baina sasoiko antxoa freskoa dugunean, hura erabil dezakegu.
4. Azken ukitua emateko, jarri oliba beltz birrindu pixka bat gainean. Prest ditugu mokadutxoak goxo-goxo dastatzeko.
Gaiak
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.
